Bordi i Transaprencës rrit sërish çmimin e karburanteve

Bordi i Transparencës ka vendosur të rrisë sërish çmimin e naftës dhe benzinës, jo pse ndodhi hataja në bursa por ndoshta për t’i dëshmuar këtij mileti se “këtu ka shtet”.

Kështu, nafta u rrit për 5 lekë dhe ajo do të tregtohet me 187 lekë për litër ndërsa benzina ka shënuar një rritje më të lehtë dhe do të tregtohet me 185 për litër, nga 182 lekë sa ishte deri më sot.

Çmimi i gazit mbetet i pandryshuar, 75 lekë për litër.

Ndryshe, çmimet e caktuara nga Bordi i Transparencës hynë në fuqi sot në datë 23 Mars, ora 18:00, dhe do të jenë të vlefshme deri në mbledhjen e ardhshme të Bordit ku do të pasqyrohen ndryshimet e çmimeve të shitjes.

Ndërkohë për ata që shqetësohen se çfarë thotë Partia po bënë Bordi duhet ta dinë se në bursat ndërkombëtare nafta ka shënuar një rritje të lehtë duke u tregtuar me 77 dollarë për fuçi, nivel ky më i ulët prej tetorit të vitit 2021, kur Qeti me shokë e tregtonte naftën me 175 lekë për litër!

Njoftim:

Vendimet e Bordit të Transparencës në datë 23 Mars 2023 kanë ndryshime të çmimit nga ai i përcaktuar në mbledhjen e fundit.

Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 187 lekë/litri, ndërsa i shitjes me shumicë jo më shumë se 175 lekë/litër.

Çmimi i shitjes me pakicë i nënproduktit benzinë e standardit SSH EN të jetë jo më shumë se 185 lekë/litri, ndërsa i shitjes me shumicë jo më shumë se 173 lekë/litër.

Çmimi i shitjes me pakicë i nënproduktit gaz, të jetë 75 lekë/litri me pakicë dhe i shitjes me shumicë 63 lekë/litër për automjetet.

Çmimi i gazoilit për peshkim është vendosur 93 lekë/litër.

Çmimet e caktuara nga Bordi do të hynë në fuqi në datë 23 Mars  ora 18.00, dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.