Bordi i Transparencës respekton Black Friday, ul çmimin e benzinës me 1 lekë

Bordi i Transparencës vjen me ulje spektakolare të çmimeve të karburanteve pikërisht për Black Friday.

Një litër benzinë është ulur për plotë 1 lek dhe do të tregtohet 194 lekë për litër ndërsa çmimi i naftës është ulur me 3 lekë dhe do të tregtohet me 211 lekë për litër.

Dhe meqë u bënë gaz i botës, Bordi e la të pandryshuar çmimin e gazit dhe do të tregtohet me 71 lekë për litër.

Ndryshe, çmimet e caktuara nga Bordi hynë në fuqi sot datë 25 Nëntor, ora 18:00, dhe do të jenë të vlefshme deri në mbledhjen e ardhshme të Bordit ku do të pasqyrohen ndryshimet e çmimeve të shitjes.

Njoftim:

Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 211 lekë/litri, ndërsa i shitjes me shumicë jo më shumë se 199 lekë/litër.

Çmimi i shitjes me pakicë i nënproduktit benzinë e standardit SSH EN të jetë jo më shumë se 194 lekë/litri, ndërsa i shitjes me shumicë jo më shumë se 182 lekë/litër.

Çmimi i shitjes me pakicë i nënproduktit gaz, të jetë 71 lekë/litri me pakicë dhe i shitjes me shumicë 59 lekë/litër për automjetet.

Çmimi i gazoilit për peshkim është vendosur 118 lekë/litër.

Çmimet e caktuara nga Bordi do të hynë në fuqi në datë 25 Nëntor, ora 18.00, dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.