Bota me mbi 1.5 mln të infektuar dhe 94.844 të vdekur nga koronavirusi

Numri i të prekurve me koronavirus në botë ka shkuar 1.586.023 ndërsa betejën e humbën 94.844 njerëz.

Aktualisht, numrin më të madh të infektuarve e ka SHBA, 432.596, ku New Yorku sërish shënon rekordin me numrin e të vdekurve, 799, shifra këto që ditë më parë raportoheshin nga Italia ose Spanja. Mirëpo, New Yorku në 24 orët e fundit ka numrin më të vogël të rasteve të reja që nga shpërthimi i krizës.

SHBA ka shënuar 15.700 të vdekur nga COVID-19, duke kaluar edhe Spanjën e cila sipas të dhënave të Institutit John Hopkins ka 5.238 të vdekur.

Italia ka raportuar se në gjatë 24 orëve të fundit kanë vdekur 610 njerëz ose 68 më shumë se një ditë më parë ndërsa sipas Mbrojtjes Civile edhe numri i rasteve të reja ka pësuar rritje që ka zhgënjyer vendin i cili nga 9 Marsi është në karantinë dhe filloi të besoj se sëmundja po tërhiqej. Aktualisht, Italia ka 143.626 të prekur  me koronavirus ndërkohë janë 18.279 që e kanë humbur betejën, që është dhe shifra më e madhe në botë.

Në Britaninë e Madhe gjatë 24 orëve kanë vdekur 881 njerëz duke e çuar në rreth 8 mijë numrin e të vdekurve nga koronavirusi, tha duke përditësuar të dhënat, ministri i Jashtëm, Dominic Raab ndërsa shtoi se Britania ende nuk e ka arritur kulmin e epidemisë dhe është shumë herët për lehtësimin e masave.

Të prekur me koronavirus janë mbi 65.000 kështu që Raab kërkoi nga britanikët të rrinë në shtëpi.

Ndërkohë Kryeministri Boris Johnson është larguar nga kujdesi intensiv meqë gjendja e tij është përmirësuar dukshëm.