“Brain Gain”, Berisha: Njeriu nuk ka asgjë tjetër më të çmuar se libri!

Kryetari i Partisë Demokratike, Sali Berisha, sot ka dhuruar disa libra për anëtarët e Departamentit Brain Gain dhe Ekselencës në PD, duke ju bashkuar kështu nismës “Dhuro një libër, ndriço një mendje”, nismë e cila synon dërgimin e librave atje ku ka pamundesi financiare.

“Dua t’ju përgëzoj për nisëm fisnike shumë të rëndësishme, ju dhe të gjithë departamentin e ‘Brain Gain’, që me veprimtaritë tuaja keni filluar të bëheni një nga departamentet, siç ju takon, më vibrante në jetën e PD, në ndryshimin e pritshëm nga mbarë shqiptarët e kësaj partie,” tha Sali Berisha duke folur për nismën e dhurimit të librit, i cili për fat të keq sot përjeto një krizë të thellë, dhe me pasoja serioze për shoqërinë ndërsa garantoj:

“Nesër PD në pushtet do të ketë një politikë mbështetjeje të fuqishme për librin. Në fakt, ne e nisëm dhe ecëm në hapa të rëndësishme si me politikat fiskale, ashtu edhe me financimin e librarive të të gjitha shkollave. Tani çdo gjë është në regres dhe priten zgjedhjet e ardhshme për të marrë edhe librin vendin e nderit që i përket në një shoqërinë e një vendi.”

Fjala e plotë:

Së pari njëherë, dua t’ju përgëzoj për nisëm fisnike shumë të rëndësishme, ju dhe të gjithë departamentin e ‘Brain Gain’, që me veprimtaritë tuaja keni filluar të bëheni një nga departamentet, siç ju takon, më vibrante në jetën e PD, në ndryshimin e pritshëm nga mbarë shqiptarët e kësaj partie.

Prania e këtij departamenti është shumë shpresëndjellëse, se elitat e reja të kombit do t’i përkushtohen shoqërisë shqiptare, do t’i përkushtohen Shqipërisë.

Ndër nismat që keni marrë, është kjo e dhurimit të librit, i cili për fat të keq sot përjeto një krizë të thellë, dhe me pasoja serioze për shoqërinë tonë. Asgjë nuk e ka ndryshuar, dhe nuk e ndryshon botën më shumë sesa libri. Asgjë tjetër nuk ka njeriu më të dobishëm, mik më të çmuar se libri.

Libri këtu përballet me dy problematika serioze. Njëra është universale, teknologjia. E vërteta është krijon tek fëmijët njëlloj shkëputje, gjë që për mua është shumë e padëshirueshme. Libri është i pazevëndësueshëm. Me një rol përcaktues në imagjinatën e njeriut. Në fund të fundit, njeriu ëndrrat, i ka në imagjinatën e tij, dhe kjo ka një rëndësi të jashtëzakonshme.

Së dyti, në pasurimin e kulturës gjuhësore. Edhe këtu libri ka një rol të pazëvendësueshëm. Në Shqipëri, këto vitet e fundit ka një politikë pothuajse shtetëruese të librit. E vërteta është me terma tjerë shterruese, ku përpjekjet e mëdha që kryeministri të diktojë panairet, panairet ndërkombëtare, të marrë kompetencat e shoqatës së botuesve, e cila kudo ka një rol shumë të rëndësishëm në promovimin e librit dhe letrave, qoftë edhe në rregullimin e këtij tregu.

Këto tani, janë të përqendruara në duart e një njeriu që në rrafshin artistik, pavarësisht se çfarë e imagjinon veten, unë do ripërsëris këtu fjalët e dy kritikëve të mirënjohur italianë, sepse bëri gafën e tmerrshme dhe shkoi në bienale si kryeministër. E turpëroi veten dhe vendin. Se një kryeministër nuk mund të shkonte. Bienale është hapësira e artistëve, nuk është hapësirë e zyrtarëve të korruptuar, dhe aty dy kritikë arti i cilësuan zhgarravonat e tij, si zhgarravvina të një adulti të droguar.

Mirëpo, ky formim i tiji po pasqyrohet dhe në politikën e librit, një politikë shtrënguese, me taksa të rënda, diktuese, etj.

Unë kam zgjedhur për nismën tuaj sot t’ju dhuroj dy libra, dy vëllime të veprës së Martin Camajt. Një gjeni, të cilin për gjysmë shekulli e përjashtoi regjimi, dhe tani e përjashton  drejtshkrimi. Dhe tani e bën këtë kollos të letrave shqipe, një gjeni gjysmë të ndaluar, pasi ai që u quajt drejtshkrim, ai u bë shtrati prokustit të gjuhës shqipe, ku diktatori siktoi rregulla vetëm e vetëm zhvishte shqipen nga liturgjishtja, dhe të ndëshkonte dialektin geg, meqënëse ai atë zonë e konsideronte jomiqësore.

Sidoqoftë, Martin Camaj mbetet një nga kollosët e letrave shqipe.

Teodor Keko, është një tjetër poet, shkrimtar i talentuar, por që jeta e tij ishte relativisht i shkurtër. Teodori i ishte një shpirt i lirë, dhe në diktaturë Teodori u përpoq të mos përshtatej, përkundrazi të shprehte mendimet e tij, dhe vepra e Teodorit është me të vërtetë një perlë, një bizhu në letërsinë shqiptare. Ai që lexon do të njihet me një poet të madh, një poet klasi.

Noel Malcolm, Kosova. Kombi shqiptar i detyrohet pafundësisht këtij studiuesi të shquar. Ndoshta njëri nga kontributorët tonë në historinë kombëtare për sa i përket studimeve të historisë së shqiptarëve. Kjo vepër është lexuar dhe Presidenti Bill Klinton në vendimet e tij për të udhëhequr NATO-n në çlirimin e Kosovës, ka patur parasysh e dhe afirmimet e origjinës, autoktonisë së shqiptarëve në Kosovë për çlirimin e tyre.

Noel, ka edhe vepra të tjera kushtuar shqiptarëve, të cilat janë të pakrahueshme në fondin e historisë dhe shkencave historike. Profesor i Oxfordit, një kapacitet i jashtëzakonshëm sot në këtë fushë.

Një vepër tjetër me studime kushtuar prijësit tonë të përjetshëm, Skënderbeut. Sa më shumë të shkruajmë, sa më shumë të lexojnë shqiptarët për heroin e tyre, aq më i madh bëhet frymëzimi, admirimi dhe mirënjohja për atë çfarë ai ka bërë.

Nuk di të ketë ndonjë udhëheqës tjetër real si Skënderbeu, që me luftrat dhe kontributin e tij të jetë shndërruar në një element palcor i identitetit kombëtar të shqiptarëve. Skënderbeu më shumë se çdo gjë tjetër frymëzon shpirtin e pamposhtur të tyre, dhe të fitores.

Historia e popullit shqiptar është vepër e akademisë së shkencave, e cila në të vërtetë nuk është se është e çliruar nga histografia e së shkuarës, por megjithatë materialet e këtyre dy vëllimeve qendrojnë dhe sa më shumë të mësojmë historinë e vendit tonë, aq më shumë do ta kuptojmë dhe do ta duam Shqipërinë.

U garantoj dhe një gjë. Nesër PD në pushtet do të ketë një politikë mbështetjeje të fuqishme për librin. Në fakt, ne e nisëm dhe ecëm në hapa të rëndësishme si me politikat fiskale, ashtu edhe me financimin e librarive të të gjitha shkollave. Tani çdo gjë është në regres dhe priten zgjedhjet e ardhshme për të marrë edhe librin vendin e nderit që i përket në një shoqërinë e një vendi.

Shumë faleminderit!

Unë jam shumë mirënjohës dhe krenar për të gjithë veprimtarinë tuaj. Faleminderit!