Singapor, varje në litar për trafikantin e marijuanës

Tangaraju Suppiah, 46 vjeç, nga Singapori, nesër do të varet në litar për shkak të trafikut me marijuanë.

Autoritetet theksojnë se ekzekutimi i dënimit me vdekje të 46 vjeçarit do të bëhet nesër, raporton BBC ndërkohë aktivistët në Singapor thonë se Tangaraju është dënuar duke u bazuar në dëshmi aspak bindëse.

Singapori ka disa prej ligjeve më të rrepta kundër drogës në botë për të cilat thotë se janë të domosdoshme për mbrojtjen e shoqërisë.

Gjatë ditëve të fundit anëtarët e familjes së të dënuarit i kanë dërguar letër presidentes së Singaporit, Halimah Yacob, ku i kërkuan amnisti për Tangaraju.

Miliarderi britanik Sir Richard Branson i ka bërë thirrje Singaporit që të heqë dorë nga ekzekutimi dhe të rishikoj rastin.

“E di që vëllau im nuk ka bërë asgjë të keqe. I bëjë thirrje gjykatës që ta rishikoj çështjen nga fillimi,” tha e motra e Tangaraju, Leela Suppiah, para gazetarëve.

Ndryshe, Tangaraju Suppiah është dënuar për “pjesëmarrje në konspiracion” trafikimin e një kilogrami marijuanë nga Malajzia në Singapor në vitin 2013, raporton BBC. Ndonëse nuk është kapur gjatë trafikimit, prokurorët janë shprehur se ai ishte fajtor për koordinimin, dhe këtë e kishin konstatuar me përgjimin e dy telefonave që ai kishte përdorur.