Braktis PDIU për Rilindjen/ Ja deputetja e Dibrës që i bashkohet PS

Një tjetër deputete i është bashkuar zyrtarisht Rilindjes së Edi Ramës. Bëhet fjalë për deputeten e PDIU-së, Reme Lala, e cila duket se ka braktisur forcën politike me të cilën mori mandatin e deputetes në qarkun e Dibrës dhe i bashkohet PS-së.

Kjo është pohuar nga vetë deputetja gjatë mitingut të Edi Ramës në Dibër, në kuadër të nisjes së punimeve për Rrugën e Arbrit.

“Kam mundur të shoh e dëgjoj live shumë gjëra gjatë këtij viti të parë të mandatit tim. Kam mundur të kuptoj se nuk janë të gjithë njësoj. (I drejtohet Edi Ramës) Ju keni të drejtë kur thoni: nuk jemi më të mirë, por më të mirë nuk kemi parë.

As unë nuk jam më e mira kryetar i PS, por më të mira kam parë në partinë tuaj. Ndaj dua të bashkohem me më të mirat, Olta Xhaçka, Eglantina, Gjermeni, Lindita Nikolla….

Por ndërkohë oreksi vjen duke ngrënë dhe dua të më premtoni sot edhe rrugën Maqellarë-Peshkopi”, u shpreh deputetja Lala.