“Brdo-Brijuni”, Osmani: Kosova, rol aktiv në formësimin e së ardhmes së rajonit

Presidentja e Kosovës, Vjosa Osmani, duke marrë pjesë në Procesin Brdo-Brijuni, i cili po mbahet në Shkup, tha se Kosova ka rol aktiv në formësimin e së ardhmes së rajonit.

“Falënderoj Presidentët Pendarovski, Musar dhe Milanoviç për mirëseardhjen e tyre në fillim të takimit të liderëve të procesit Brdo-Brijuni. Kosova ka rol aktiv në formësimin e së ardhmes së rajonit dhe kontribut përmbajtësor për rrugën e përbashkët euro-atlantike,” tha Presidentja Vjosa Osmani.

Liderët e Ballkanit në Shkup

Ndryshe, Presidentja e Kosovës, Vjosa Osmani dhe liderët tjerë ballkanik sot në Shkup zhvillojnë takimin vjetor në kuadër të Procesit të Brdo-Brijuni.

Në sesionin e përbashkët me liderë të rajonit, presidentja Vjosa Osmani pritet të mbajë një fjalim, ndërkaq më pas do të zhvillojë takime dypalëshe me krerët e disa shteteve pjesëmarrëse.

Temat qendrore të takimit të sivjetëm janë përshpejtimi i procesit të anëtarësimit në BE, luftimi dhe zvogëlimi i pasojave nga ndryshimet klimatike në rajon, si dhe krijimi i kushteve për qëndrimin e të rinjve në Ballkanin Perëndimor.

Gjatë qëndrimit në Maqedoninë e Veriut, Presidentja e Kosovës, Vjosa Osmani, do të marrë pjesë në ceremoninë e përurimit të bustit të Shën Terezës në hapësirën e Ambasadës së Republikës së Kosovës në Shkup.

Procesi Brdo-Brijuni është një nismë rajonale e bashkëthemeluar nga presidentët slloven dhe kroat në vitin 2010 ku çdo vit takohen presidentët e gjashtë shteteve të Ballkanit Perëndimor, ku në fokus është procesi i zgjerimit të Bashkimit Evropian dhe anëtarësimi i rajonit në BE.