Rajonet e prekura nga përmbytjet në Greqi, ende pa energji elektrike

Si pasojë e mungesës së energjië elektrike, rajonet e prekura nga përmbytjet në Greqi kanë mbetur edhe pa ujë të pijshëm.

Në qytetin Volos me 150.000 banorë, rrjeti i furnizimit me ujë është shumë i dëmtuar, prandaj banorët e zonës janë duke siguruar furnizime nëpër rrugë alternative, raporton sot ERT.

Sipas brigadës së zjarrit, pothuajse 4.500 persona janë shpëtuar deri më tani, mirëpo puna e ekipeve të shpëtimit është duke vazhduar.

Ka ende njerëz të zhdukur dhe numri i të vdekurve nga përmbytjet sot ka shkuar në 15, thekson kjo brigadë.

Shkalla e saktë e dëmeve nuk dihet ende, pasi në shumë zona shihen vetëm kulmet e shtëpive.

Ndryshe, javën e kaluar Greqia është përballur me stuhi të fuqishme, raporton RFE. Shirat e rrëmbyeshëm kanë përmbytur fshatra dhe qyteza. Sasia e shiut ka arritur në nivele të pashembullta, më shumë se 700 milimetra në më pak se 24 orë.