Bullgari, 170 kilogramë kokainë në konteinerë me banane

Zyrtarët doganorë në Bullgari kanë konfiskuar rreth 170 kilogramë drogë të llojit kokainë, që po transportoheshin me anije përmes një dërgese me banane nga Ekuadori.

Prokurori i qarkut, Georgi Chinev, tha sot se droga ishte fshehur në konteinerët me banane, që po transportoheshin me anijen e mallrave, Madison 2, që kishte bërë një ndalesë në Maltë. Ai tha se vlera e drogës së konfiskuar është 6.2 milionë euro, raporton RFE.

Drejtoresha e Agjencisë së doganave, Petya Bankova, tha se ky është konfiskimi më i madh që ka ndodhur në Portin e Burgasit.

Ajo tha se droga ishte fshehur në 150 paketime që ishin vendosur prapa një muri të ndërtuar në njërin prej konteinerëve me banane.

Anija u largua nga porti pasi shkarkoi mallrat, tha Bankova.

Autoritetet bullgare kanë nisur një hetim për pranuesit e dyshuar të kokainës, të cilët mund të përballen deri me 20 vjet burgim nëse gjenden fajtorë për trafikim të drogës, raporton RFE.

Ndryshe, Bullgaria, që viteve të fundit ka rritur përpjekjet në luftën kundër trafikut të drogës, konsiderohet një pikë transiti për kokainën që vjen nga Amerika Latine dhe ka destinacion Evropën Perëndimore.