Bushati e falënderon/ Reagimi, Idrizi: Për çfarë e falënderon Kotzias?

Kryetari i PDIU-së, Shpëtim Idrizi, ka reaguar pas deklaratës së ministrit të Jashtëm të Shqipërisë, Ditmir Bushati, ku falënderon ministrin e jashtëm të Greqisë, tashmë i dorëhequr, Nikos Kotzias.

Shpëtim Idrizi pyet Ditmir Bushatin se për çfarë e falënderon Kotziasin, për varret e grekëve në Shqipëri, për toponimet e turpshme, për mos heqjen e ligjit të luftës apo se bertiste që çeshtja Çame nuk ekziston?

Ja deklarata e plotë:

Ministri ynë i Jashtëm paska shprehur falenderimin për Ministrin e dorëhequr të shtetit grek, Kotzias. Nuk di se për çfarë e falenderon homologun e uzos dhe të Zorbës ministri ynë?

E falenderon për varret e ushtarëve grek që sot ngrihen në territorin tonë megjithëse erdhën si pushtues, ndërsa të rënët tonë që u therën në prag të shtëpisë, ende sot janë shpirtra pa varr?

E falenderon për marrëveshjen e turpshme të toponimeve që heq qytetet e vendlindjes së pleqve tanë nga pasaportat e shtetit shqiptar, duke vazhduar kësisoj politikën e diskriminimit ndaj nesh?

E falenderon për marrëveshjen e ujrave për të cilën Kotzias mburrej se do merrte ujrat tanë duke zgjeruar të vetat nga 6-12 milje?

E falenderon se mos hoqi ligjin e luftës, e sot ministri ynë bën sikur harron se po falenderon ministrin e një shteti me të cilin është zyrtarisht në luftë?

E falenderon se bertiste që çeshtja Çame nuk ekziston e që shqiptarët e Çamërisë ishin bashkëpunëtor me nazismin?

E falenderon se po punonin bashkë për të hequr termin Çameri nga tekstet shkollore shqiptare?

Por Çameria, duhet ta dini që do jua ngrijë buzeqeshjen në buzë njësoj si Kotziasit. E drejta e nëpërkëmbur e shpirtrave që humbën jetën dhe të atyre që lanë pas një jetë të tërë e shtëpitë e tyre, është haku njerëzor që do ngrijë çdo akt tradhetie ndaj saj e do na mbajë gjithë jetën tonë përballe armiqve e në krah të miqve. Ne nuk harrojme!!!