Bushati si Kotzias: Marrëveshja me Greqinë, fajin e kanë opozitat e dy vendeve…

Ministri për Europën dhe Punët e Jashtme, Ditmir Bushati, ka folur me të njëjtën gjuhë si homologu I tij grek, Nikos Kotzias, duke akuzuar opozitën, qoftë në Shqipëri, ashtu edhe në Greqi, lidhur me marrëveshjen mes dy vendeve, veçanërisht sa i takon kufirit detar.

“Jemi në bisedime serioze me Greqinë, kemi hedhur hapat për shumë çështje që konsideroheshin tabu deri para pak viteve. Jemi në bisedime qoftë dhe për kufijtë detarë dhe ato tokësorë me piramidat për të shmangur incidentet.

Por nga ana tjetër shohim që ka një strategji të orkestruar për ta mbajtur peng. Duhet ta kuptojmë shumë qartë se nuk ka qenë e lehtë të uleshim në tryezë.

Do të kemi një marrëveshje të zbatueshme, do të jetë një marrëveshje e drejtë dhe më e mirë se ajo që është bërë në shkuarën.

Ata që kanë bërë gabimet sot për sot bërtasin më shumë në çdo lloj media, për copëtim të trojeve shqiptare dhe tradhti ndaj kombit.

Nuk e di nëse është e orkestruar apo koincidencë për kundërshtim nga të dyja opozitat, por kjo tregon se jemi në rrugën e duhur”, theksoi Bushati.