Çmenden Rama e Duka, 1 miliardë lekë për stadiumin e Përrenjasit…

As më pak e as më shumë, por plot 1 miliardë lekë është vlera që Qeveria, FSHF dhe Bashkia e Përrenjasit, kanë programuar për ndërtimin e stadiumit të ri në këtë bashki.

Megjithëse skuadra e bashkisë me emrin Domosdova luan në kategorinë e 3-të, kjo nuk ka penguar Qeverinë, FSHF dhe Bashkinë e Përrenjasit që të bashkojnë forcat dhe të përcaktojnë shifrën prej 1 miliardë lekësh për stadiumin e qytetit.

Një shifër e cila nëse do të investohej në drejtime të ndryshme në Bashkinë e Prrenjasit mund t’ia bënte jetën më të lehtë qytetarëve, mund të kishte shkolla e kopshte model, apo qendra shëndetësore dhe spitalore.

Por jo, paratë do të shkojnë për të ndërtuar stadiumin. Kjo për shkak se Përrenjasi nuk ka një fushë futbolli për shkak se fusha e sportit u prish për të ndërtuar qendrën e qytetit.

Kryetarja e Bashkisë, Miranda Rira, e sheh ndërtimin e këtij impianti si një zhvillim tejet të rëndë- sishëm në disa aspekte.

“Kemi arritur të sigurojmë në bashkëpunim financimin e një impianti të ri sportiv në qytetin tonë që i afrohet shifrës 1 miliard lekë. Një shumë jo e vogël, një investim jo dosido që jo çdo bashki e vogël si kjo e jona mund ta përfitojë. Ishte bashkëpunimi dhe dashamirësia e qeverisë shqiptare, e cila ka pjesën e saj, po ashtu Federata Shqiptare e futbollit me në krye z. Duka që e falënderoj për bashkëpunimin, i cili ka dhënë OK e tij për tapetin e fushës dhe impiantin e vaditjes.

Dhe ne si bashki kemi bërë detyrën tonë, duke u bërë pjesë e investimit me një fond jo të vogël. Lajmi i mirë është që ekipi i futbollit të qytetit tonë do ketë një shtëpi të sajën për të zhvilluar ndeshjet dhe nuk do ndihet më i braktisur në këtë drejtim.

Punimet do të fillojnë shumë shpejt dhe po shumë shpejt do përfundojnë. Mendohet që puna të nisë në qershor dhe në pranverën e vitit tjetër të ketë përfunduar”, tha ajo