Çmimi i naftës në bursa, pas rënies për tre javë me radhë…
Çmimi i naftës në tregun londinez ka pësuar rënie edhe javën e kaluar, sepse tregtarët kishin frikë se rritja e normës së interesit nga bankat qendrore për shkak të inflacionit të madh do të ngadalësojnë rritjen ekonomike botërore, që do të ulte dhe kërkesën për naftë por mëngjesi i sotëm pësoi tronditje në bursa.
Çmimi i barelit në tregun londinez ka rënë javën e kaluar për 5.5 për qind, në 101.16 dollarë, deri sa në tregun amerikan bareli ra 6.9 për qind, në 97.59 dollarë.
Ulja më e madhe javore e çmimit të naftës në muajin e fundit u vlësua si pasojë e rritjes së normave të interesit të bankave qendrore në botë me theks të veçantë te ajo amerikane FED, pasi javën e kaluar u tha se inflacioni në qershor ka arritur 9.1 për qind, nivel ky më i larti në 40 vitet e fundit.
Për këtë arsye, pritet që në muajin korrik, FED, për të dytin muaj me radhë, të rris normat kyçe të interesit për 0.75 për qind, madje disa parashikojnë deri në 1 për qind. Aktualisht në tregje vlerësojnë se ekziston 75 për qind e mundësisë që FED të rris për 0.75 për qind normën e interesit, e 25 për qind vlerësojnë se kjo do të jetë 1 për qind.
Ndërkohë mëngjesin e sotëm në bursat aziatike u rritën aksionet pas rritjes në Wall Street, derisa vlera e dollarit ra në nivelin më të ulët në 20 vite. Kështu indeksi aziatiko-paqësor i aksioneve, MSCI, pa ato japoneze, në orën 7:00 ishte në plus 1.4 për qind, pas rënies së javës së kaluar për 3.5 për qind.
Në mëngjes, çmimet e aksioneve në Australi, Shangaj, Korenë Jugore dhe Hong Kong u rritën 0.8 derii 2.4 për qind, deri sa në Tokio bursa nuk punon për shkak të festës.
E në tregun valutor, dollari pësoi rënie pas rritjes nga java e kaluar në nivelin më të lartë në 20 vitet e fundit. Indeksi i dollarit që tregon vlerën ndaj gjashtë valutave kryesore sot është 107.78 pikë deri sa të premten e përmbylli ditën me 108.05 pikë.
Ndaj valutës japoneze ai ra nga 138.55 në 138.35 jen ndërsa ndaj asaj evropiane nga 1.0080 sa ishte të premten sot është 1.0105 dollarë.
Për pasojë edhe çmimet e naftës sot u rritën për 0.72 për qind për barel në 101.89 dollarë në tregun londinez, dhe 0.39 për qind për barel, në 97.97 dollarë në tregun amerikan.
Në tregje, me shumë interes po përcillet vizita e presidentit amerikan Joe Biden në Lindjen e Mesme, ku pritet që nga partnerët e SHBA të kërkohet rritja e prodhimit të naftës.
