Protestoi kundër luftës në Channel One, arrestohet gazetarja ruse

Gazetarja ruse, Marina Ovsyannikova, e cila në muajin mars në një program të televizionit shtetëror protestoi kundër pushtimit rus në Ukrainë është arrestuar në Moskë.

“Marina është arrestuar,” figuron në një publikim në kanalin e saj në Telegram, shoqëruar me një foto me dy policë të cilët po e shoqëronin drejt furgonit të policisë.

Shumë shpejtë pas këtij arrestimi, në profilin e saj në Facebook, Marina Ovsyannikova publikon foton e saj me dy qentë.

“Isha duke shetitur me qentë e mi, sapo kalova derën, mu afruan njerëzit me uniformë,” thekson ajo duke shtuar:

“Jam ulur në ministrinë e Punëve të Brendshme, Krasnoselski.”

Tre orë pas këtij publikimi, Marina Ovsyannikova thotë se është lënë e lirë.

“Në shtëpi, gjithçka është në rregull,” shkruan Marina në Facebook.

“Por tani e di që gjithmonë është më mirë të marrësh me vete valixhen dhe pasaportën kur del jashtë shtëpisë.”

Ndryshe, Marina Ovsyannikova u bë e njohur në muajin mars kur me rastin e edicionit të lajmeve u fut në studio të televizionit shtetëror ku punonte në atë kohë, dhe dënoj luftën në Ukrainë.

“Ndaloni luftën. Mos i besoni propagandës. Ata po ju gënjejnë”, shkruante në parullën që mbante në dorë ndërsa bërtiti: “Ndaloni luftën. Jo luftës!”.

Ajo u gjobit me rreth 500 dollarë nga një gjykatë ruse për thirrje të paligjshme të protestave.

Ndërkohë arrestimi i djeshëm për rreth tre orë erdhi pasi u shfaq më 15 Korrik në rrjetet sociale me një parullë ku Presidentin e Rusisë, Vladimir Putin e quante vrasës, e ushtarët e tij fashist.

“Edhe sa fëmijë duhet të vdesin para se të ndaloni?” shkruante në pankartën që mbante.

Kompania mediatike gjermane Welt, në muajin prill e angazhoi Marina Ovsyannikovan si korrespodente. Ajo u kthye në Rusi në fillim të këtij muaji duke sqaruar në profilin e saj në Facebook se ishte detyruar të kthehej për shkak të luftës për kujdestari ndaj fëmijës në kontestin gjyqësor kundër bashkëshortit.