Ç’na pa Carlo, ç’na pa Syri! Hunda juaj ku nuk hyri: te i miri, te i ligu, te spiuni më i ndyri!

A janë të lira mediat në Shqipëri?! Kjo është një çështje që trajtohet në raportet e shumta të Shqipërisë në tranzicion, dhe ka vetëm një përgjigje, fatkeqësisht dëshpëruese: Po, janë të lira të mbrojnë krimin!

Këtë e dëshmon së fundi edhe përplasja e dy mediave, pas publikimit të një fotoje ku shihet Presidenti i Republikës, Ilir Meta në një festë i shoqëruar me dy eksponentë të botës së krimit, të njohur në Shqipëri!

Duke mos u futur në historinë e themelimit dhe fondeve të këtyre mediave, parimet e gazetarisë na nxjerrin cilësinë e dy mediave ashtu siç janë ata që i mbrojnë, llum, Ilir Meta dhe Edi Rama!

Disa javë më parë, kur u publikua fotoja e Edi Ramës me njërin nga eksponentët e botës krimit në Elbasan, Ardian Çapja, Syri e sheh Kryeministrin Rama në gjendje të rëndë nervore për fotot me Çapajt:

“I ftuar në emisionin “Opinion”, kryeministri Edi Rama u kap ngushtë nga gazetarët e ftuar teksa e pyetën për publikimin e fotos së tij përkrah të fortit të Elbasanit, Ardian Çapja.

Duke mos patur asnjë përgjigje të  besueshme për të dhënë, Rama reagoi jo me fjalë, por me një mimikë që tregonte më së miri nervozizmin e tij,” raportonte Syri për Kryeministrin Edi Rama.

Carlo Bollino për shumë arsye nuk e sheh Edi Ramën me nerva mbrëmjen e 13 shkurtit, dhe nuk e gjykon atë në një foto me një eksponentë të botës së krimit, por raporton për broçkullat e Kryeministrit po në këtë emision mbi arsyetimet e tij për makinën e blinduar. Për Edi Ramën në foto me Ardian Çapjan “as gëk as mëk” dhe u mjaftua me sqarimin e Kryeministrit se ishte në një fushatë zgjedhore e që sipas Ramës i lejohet dhe kjo gjë.

Kështu iku 13 shkurti me foton skandaloze të Kryeministrit të Shqipërisë, Edi Rama me një njeri që nuk ia ka frikën vetëm Elbasani!

Pas 20 ditësh vjen 4 Marsi, dhe Carlo publikon një foto të Presdientit të Republikës, Ilir Meta me dy eksponentë të botës së krimit, Xhevdet Troplinin dhe Altin Hajrin, teksa ndodhen duke festuar e ngritur dolli në lokalin e Lefter Kokës në Durrës. Fotot, siç raporton media e Carlos, janë bërë në korrik 2017 për të festuar fitoren e Lefter Kokës i dalë deputet nga zgjedhjet parlamentare si përfaqesues i LSI.

“Në njërën nga fotot ekskluzive  Meta shfaqet duke ngritur dolli teksa në krah ka pikërisht Xhevdet Troplinin, të akuzuar për trafik ndërkombëtar të drogës dhe subjekt i OFL-së që duhet të justifikojë pasurinë,” raporton Shqiptarja.com dhe Report.TV dyja këto të Carlso duke shtuar se pjesa më e madhe e portaleve dhe të mediave kryesore shqiptare nuk i kanë publikuar këto foto.

Madje Carlo pretendon se Leonard Koka, vëllai i ish-deputetit të LSI, Lefter Koka, ka shantazhuar botuesin Carlo Bollino pas publikimit të fotove që tregojnë presidentin e republikës Ilir Meta në një darkë në krah të dy trafikantëve të drogës Xhevdet Troplini dhe Altin Hajri. ”Unë kam shumë foto Karlo, për ty dhe për ata që paguajnë ty”, shkruan mes te tjera Nard Koka në një mesazh me ofendime që ja ka besuar për publikim një gazetari të Syri.net. Leonard Koka gjykoi me te rëndësishme te saktësojnë se dy trafikantët nuk ishin aty për të festuar fitoren e LSI-së në zgjedhjet e qershorit 2017, por për të festuar ditëlindjen e Lefterit. Asnjë shpjegim nga ana e tij për praninë e dy trafikantëve në atë tavolinë.

I çuditshëm ky gjykimi i Carlos si dhe pritshmëria që të reagojnë shoqatat e gazetarëve ndaj këtij “shantazhi publik që përmes një medie i bëhet një medie tjetër që guxon të denoncojë me fakte dhe foto lidhjet mes krimit dhe politikës.”

Po pse nuk reagoi Carlo kur doli fotoja e Edi Ramës me Ardian Çapjan, apo aty nuk ishte Ilir Meta dhe nuk quhet edhe pse kemi një eksponentë të krimit! Apo duhet të jenë dy eksponentët të krimit që të quhet skandaloze?!

Dhe, vjen reagimi edhe pse nuk është shkruar nga media e Carlos, i ngjashëm si dy pika loti, por që mbron Ilir Metën. Carlo akuzon Presidentin e Republikës, Ilir Meta që del në foto me dy kriminel, “Syri i Metës” boton sqarimin e Nard Kokës për foton thuajse i pengoi njeriu pse Koka ishte në foto! Të ulesh me kriminel në një festë nuk është vlerë pavarësisht çka thotë Nari, që nuk është temë e fotos, por ai që ka një kulturë minimale mbi festat shqiptare, e din që në tavolinë ulet një familje ose nëse nuk janë të ftuar si të tillë, miq të përbashkët dhe pak rëndësi nëse në atë foto ishte Ilir Meta ose Edi Rama! Aty ishte krimi!!!

Pastaj sqarimi mbi pronën e medias të sulmuar nga Carlo është i ngjashëm si ai i makinës së blinduar të Edi Ramës që fliste Carlo. Nëse Syri e sheh Ilir Metën ashtu siç e sheh Carlo, Edi Ramën, atëherë këtu pranohet edhe liria e vetme që kanë mediat në Shqipëri, të mbrojnë krimin!

Dhe, këtu nuk është e vetmja e keqe e stofit të mediave që mendojnë se janë të fuqishme në Shqipëri.

Duke e kuptuar mbrapsht demokracinë, sot në Shqipëri kemi rendin demokratik më katastrofë në botë ku nuk ku as ndërmarrje, as banka, as sindikata dhe fatkeqësisht as media të lira dhe demokratike!

Duke e kuptuar mbrapsht kapitalizmin sot kemi ndërmarrjet më kriminale në Ballkan, dhe e tepruar është të flitet për Evropën ose Amerikën. Dhe, mediat do të mbrojnë ose sulmojnë këto ndërmarrje në varësi të shijes së pronarit, i cili është mik i Edi Ramës ose Ilir Metës

Duke i kuptuar mbrapsht sindikatat, sot kemi sindikatat por ato janë versioni më i shëmtuar i një shoqërie demokratike. Dhe, ato mbrohen ose sulmohen nga mediat në varësi të shijeve të kryesindikalistëve, me Edi Ramën ose Ilir Metën!

Duke i kuptuar mbrapsht bankat, sot ato funskionojnë me afërsinë që kanë me pushtetin dhe jo tregut bankar. Dhe, fatkeqësisht sot edhe norma e tyre e interesit shpjegohet nga qytetarët me afërsinë që kanë me Edi Ramën ose Ilir Metën.  

Dhe në fund, liria e mediave! Që krimi e ka pushtuar Shqipërinë këtë nuk e vë njeri në dyshim, por kontrolli i hapësirës kriminale vazhdon të lëviz në mes të dy klaneve që opinioni publik i njeh, të Ramës ose të Metës! Ky opinion nuk është krijuar kot sepse pasqyrë e këtyre bandave kriminale janë mediat. Trajtimi që mediat i bëjnë një aksioni policor, vrasjes ose heshtjes së krimit, dhe së fundi fotove të Edi Ramës dhe Ilir Metës me kriminel,  japin përgjigje se nga kush kontrollohen këto media, dhe asnjëri nga pronarët e mediave, të mos flasim për qytetarin shqiptar, nuk i vë në diskutim më reklamat ose sasinë e tyre që ato japin.  

Në fund, ajo që ndodhi me foton e Ilir Metës me dy eksponentët të botës së krimit, nuk është një përballje faktesh në mes të dy mediave, por një përballje e frikshme e radhës të pronarëve të mediave nga ajo që servirin, që ka dhe shpjegim, duke perifrazuar Ali Asllanin nga Hakërrima, vulosoet fenomeni që ne po përjetojmë sot”

Ç’na pa Carlo, ç’na pa Syri! Hunda juaj ku nuk hyri: te i miri, te i ligu, te spiuni më i ndyri!

P.S. Po botojmë dhe tekstet origjinale të këtyre mediave dje:

EKSKLUZIVE/ Zbulohen FOTOT: Meta feston në 2017 me trafiktantët Xhevdet Troplini dhe Altin Hajri

Shqiptarja.com, publikon ekskluzivisht fotot e presidentit Ilir Meta me dy eksponentë të krimit, Xhevdet Troplinin dhe Altin Hajrin, teksa ndodhen duke festuar e ngritur dolli në lokalin e Lefter Kokës në Durrës. Fotot janë bërë në korrik 2017 për të festuar fitoren e Lefter Kokës i dalë deputet nga zgjedhjet parlamentaresi perfaqesues i LSI.

Shqiptarja.com publikon ekskluzivisht fotot e presidentit Ilir Meta me dy eksponentë të botës së krimit, Xhevdet Troplinin dhe Altin Hajrin, teksa ndodhen duke festuar e ngritur dolli tek pista “Ventus Harbor” në Durrës në zonën e “Vollgës” që ish-deputeti Lefter Koka ka në pronësi.

Fotot ekskluzive mendohet të jenë bërë në korrik 2017, pas zgjedhjeve parlamentare të 25 qeshorit, ndërkohë që Ilir Meta ishte president i emëruar, dhe mendohet se “sebepi” ishte për të festuar fitoren e Lefter Kokës i dalë deputet nga këto zgjedhje. Vëllai i Lefter Kokës, Leonard Koka jep një tjetër version kur thotë se fotografitë i përkasin një feste me rastin e ditëlindjes së vëllait të tij, Lefterit dhe nuk i përkasin muajit korrik, por gusht.

Në këtë tryezë miqësore të mbushur me ushqime dhe alkool, presidenti Ilir Meta ka në krah Xhevdet Troplinin.

Në njërën nga fotot ekskluzive  Meta shfaqet duke ngritur dolli teksa në krah ka pikërisht Xhevdet Troplinin, të akuzuar për trafik ndërkombëtar të drogës dhe subjekt i OFL-së që duhet të justifikojë pasurinë.

Në foton tjetër shfaqet Lefter Koka, ish-ministër i Mjedisit dhe ish-deputet i LSI-së, krah për krah me Altin Hajrin. 

Ndërkohë në një foto që ka panoramë të gjithë tryezës, Meta e ka përballë Altin Hajrin dhe në krah të tij, si mikritësin e kësaj tryeze, Xhevdet Troplinin.  

Nga pozicioni që janë ulur në tavolinë, duket që organizatori i festës është Xhevdet Troplini, i cili është ulur pikërisht mes Lefter Kokës që ka rastin për të festuar, dhe Ilir Metës, i ftuar si president dhe lideri që drejtoi gjithë fushatën e LSI-së, edhe pse ishte emëruar kryetar shteti. Pra fotoja lë shumë të kuptohet se nuk është një prezencë rastësore e Xhevdet Troplinit në këtë tryezë, ku shfaqet  i pozicionuar në mesin e dy personazheve kryesorë të festës.

Altin Hajri është pronari i kompleksit luksoz “Golden” në Shijak, që u kthye në skenën e krimit më të rëndë të ndodhur së fundi në Shqipëri, pengmarrjen dhe vrasjen e Jan Prengës më 17 janar, tashmë i sekuestruar me vendim gjykate. Hajri rezulton i shpallur në kërkim nga policia për pengmarrjen dhe vrasjen e Jan Prengës pas prishjes së pazarave të kokainës nga vëllai i Prengës në Angli dhe bandave që udhëheqin trafikun e drogës nga Shqipëria, mes të cilëve edhe Hajri.

Ndërkohë Leonard Koka, vëllai i ish-deputetit të LSI, Lefter Koka, ka shatazhuar botuesin Carlo Bollino pas publikimit të fotove që tregojnë presidentin e republikës Ilir Meta në një darkë në krah të dy trafikantëve të drogës Xhevdet Troplini dhe Altin Hajri. ”Unë kam shumë foto Karlo, për ty dhe për ata që paguajnë ty”, shkruan mes te tjera Nar Koka në një mesazh me ofendime që ja ka besuar për publikim një gazetari të Syri.net. Leonard Koka gjykoi me te rëndësishme te saktësojnë se dy trafikantët nuk ishin aty për të festuar fitoren e LSI-së në zgjedhjet e qershorit 2017, por për të festuar ditëlindjen e Lefterit. Asnjë shpjegim nga ana e tij për praninë e dy trafikantëve në atë tavolinë.

Pjesa më e madhe e portaleve dhe të mediave kryesore shqiptare nuk i kanë publikuar këto foto. As PD nuk ka reaguar deri tani dhe as Doktor Berisha i cili është gjithmonë i gatshëm të publikojë çdo gjë nga plehrat. Tani le të shohim nëse shoqatat e gazetarëve do të reagojnë ndaj këtij shantazhi publik që përmes një medie i bëhet një medie tjetër që guxon të denoncojë me fakte dhe foto lidhjet mes krimit dhe politikës.

Ora 14:58Ndodhej në tavolinë me Metën, kush është Xhevdet Troplini, subjekt i OFL i akuzuar për trafik droge

Xhevdet Troplini i njohur me pseudonimin “Poja” është subjekti i OFL, që i ka dërguar formularin për të deklaruar burimin e të ardhurave, pas dyshimeve se i ka ngritur nga aktiviteti i tij kriminal.  

Troplini është një emër jo pak i njohur në Durrës, të cilit i është sekuestruar nga OFL makina e blinduar tip ‘Jeep’. Troplini, i arrestuar për trafikim të lëndëve narkotike në 2006, ka në pronësi të tij disa biznese, mes tyre edhe lokalin në parkingun e të cilit u rrëmbye Gazmir Çollaku. Ai është përfshirë dhe i dyshuar në disa ngjarje kriminale në Durrës, por që në asnjë moment nuk është provuar fajësia e tij. Ky person del gjithashtu edhe në listën e biznesmenëve të gjobitur në Durrës nga një eksponent shumë i njohur kriminal në Shqipëri si Emiljano Shullazi.

Sipas QKR, Xhevdet Troplini rezulton se është ortak në kompaninë “Ovvital”, që merret me rritjen e shpendëve për prodhim vezësh dhe mishi dhe tregtimi i tyre brenda dhe jashtë vendit. Po ashtu, rezulton se është aksioner në një shoqëri të quajtur “EUROMAG”, ku bëjnë pjesë dhjetëra persona të tjerë.

40-vjeçari Troplini u arrestua për trafik ndërkombëtar të drogës në vitin 2006 dhe dosja ka ardhur nga drejtësia italiane pas përgjimeve ndaj tij dhe disa bashkëpunëtoreve. Droga kalonte nga Turqia, në Shqipëri dhe më pas në Itali.

Ora 14:03Zbulohet FOTO e presidentit Meta me Altin Hajrin dhe Xhevdet Troplinin subjekt i OFL

Një përplasje në distancë mes dy këshilltarëve, të presidentit dhe të kreut të grupit parlamentar socialist, ka zbuluar për herë të parë një foto të Ilir Metës me Altin Hajrin, në kërkim për pengmarrjen dhe vrasjen e Jan Prengës në janar 2020.

Ishte këshilltari për mediat i Kryetarit të Grupit Parlamentar të Partisë Socialiste, Taulant Balla i cili publikoi foton ku presidenti Meta shfaqet në rrethin e një numri të madh personash duke konsumuar ushqim. Me rreth jeshil në këtë foto, këshilltari Besjan Ajazi ka evidentuar një person, i cili është Altin Hajri dhe në krah të Metës Shqiptarja.com evidenton se ndodhet dhe Xhevdet Troplini (Poja) subjekt i OFL.

Në tavolinë ndodhet edhe ish-ministri i Mjedisit, Lefter Koka.

“Më vjen keq për gjuhën që përdor në mënyrë të vazhdueshme zëdhënësi i Presidentit, ish-kolegu im Tedi Blushi dhe shpërdorimin e tij nga ana e Presidentit apo kushdo që i shkruan.
Zoti President nëse sjellja juaj në këto kohë vjen nga dhimbjet që po shkakton OFL në botën e krimit atëherë po të themi mirë është të mos merresh me Hajrin se nuk ke për të bërë kurrë hajër. P.s. Foto e Presidentit Ilir Meta në Vilën “Golden” në Shijak, e sekuestruar nga OFL, në pronësi të grupit kriminal “Hajri”, shkruan Ajazi.

Ajazi thotë se fotoja është bërë në kompleksin “Golden” në pronësi të Altin Hajrit në Shijk, por nga sa Shqiptarja.com u interesua, vendi në fakt është pista në Durrës tek Vollga që Lefter Koka ka në pronësi.

Ndërkohë, në një reagim më parë, zëdhënësi i presidentit Meta, Tedi Blushi, shkruante: “Ciu Ciu Tao Tao. Të duket vetja i fortë ngaqë rri me çuna problematikë, por lutju Zotit që të mos kthehet i gjithë populli në “problematik”. Tao Tao, harroje zërin e Bablokut! Dëgjoje zërin e popullit, është zëri i zotit”./Shqiptarja.com/

Reagimi i ashpër/ Nar Koka përgënjeshtron Bolinon dhe Terin e ‘Rilindjes’

Karlo Bolino, pronari i ReportTv dhe Shqiptarja.com ka publikuar mesditën e sotme, disa foto të vitit 2017, të presidentit Ilir Meta me Xhevdet Troplinin, të cilit OFL i ka kërkuar burimin e pasurisë.

Në një tjetër foto, presidenti shihet pranë Altin Hajrit, pronar i kompleksit Golden ku dyshohet se është vrarë Jan Prenga.

Fotografitë duket se janë bërë në ditëlindjen e Lefter Kokës dhe këtë e ka konfirmuar edhe vëllai i deputetit, Nar Koka.

Ashtu si edhe herë të tjera që ndodh rëndom, Bolino ka nxjerrë foton e Metës pas paralajmërimit të bërë nga Taulant Balla.

E duket se gjithçka ka qenë e organizuar, sepse pas këtyre kanë nisur edhe reagimet.

Por në lidhje me fotot e bëra publike nga Karlo Bolino ka reaguar ashpër dhe vëllai i Lefter Kokës, Nar Koka.

Ky i fundit i pyetur nga SYRI.net në lidhje me vërtetësinë e fotove tha:

Ty Karlo që ke nxjerrë fytyrën time aty me Ilir Metën, po të them që ajo është ditëlindja e Lefter Kokës, vëllait tim. Teri bën nga 10 ditëlindje në vit. Kujdes se do dali edhe b… jote nga Shijaku që ke marrë për gru te ditëlindjet e Terit, që ka hyrë e dalë 100 herë tek hoteli  i Hajrave. Unë kam foto shumë Karlo, për ty dhe për ata që të paguajnë ty./Syri/

Përgjigje për Karlon që interviston vrasësit, por e ‘bezdis’ Nari

Përgjigjen e Leonard Kokës, vëllait të Lefter Kokës për një lajm të shpërndarë nga mediat e tij, botuesi Karlo Bolino duket se e ka kthyer në personale.

Me anë të një shkrimi të vendosur si kryesor në median e tij, Karlo Bolino ka vendosur të sulmojë jo vetëm Nar Kokën, por edhe SYRI.net që publikoi reagimin e këtij të fundit, pas publikimit të fotove të Ilir Metës nga ReportTv.

Pas këtij sulmi të Karlos, SYRI.net po bën një sqarim të shkurtër në lidhje me akuzat dhe për faktin se ka kërkuar një koment dhe ka marrë një përgjigje nga Nar Koka, të cilin e ka bërë publike pa shtuar dhe pa hequr asnjë presje, por thjesht duke ruajtur etikën për bashkëshorten e Karlos.

Fillimisht i bëjmë të ditur Karlos se, SYRI.net nuk është pronë e askujt tjetër, përveç se e një Fondacioni intelektualësh dhe gazetarësh të regjistruar brenda të gjitha ligjeve dhe rregullave të këtij shteti. Ndryshe nga Karlo Bollino, ky fondacion nuk ushqehet nga taksat e shqiptarëve përmes koncesioneve klienteliste të Edi Ramës.

I bëjmë të ditur Karlos se SYRI.net ka marrë zyrat e tij me qira përmes një kontrate të rregullt, e cila nuk ka asnjë lidhje me Ilir Metën apo ndonjë të afërm të tij. SYRI.net, ndryshe nga mediat e Karlo Bolinos, nuk i ka dhënë askush tokë dhe ndërtesa në mes të Tiranës me qira 1 euro për 20 vite. Për shërbimet që Karlo ka bërë gjithë këto vite, vetëm pak muaj më parë është shpërblyer nga Edi Rama me mijëra metra katrorë tokë dhe ndërtesë në një nga zonat më të kërkuara të Tiranës dhe këto Karlo i ka marrë me 1 euro qira.

Siç e thamë dhe me lart SYRI.net ka kërkuar një koment për videon në fjale dhe ka marrë një përgjigje nga z. Koka, të cilën as e ka shtjelluar as e ka komentuar.

Nuk jemi ne që kemi në dorë përgjigjen e z.Koka, por sigurisht nuk na takon t’i mbyllim gojën askujt, aq më pak të marrim leksione gazetarie nga Karlo Bollino, media e të cilit është një nga mediumet e shquara për intervistat e vrasësve.

Nëse z.Bollino mendon se pas kësaj përgjigje që ka marrë, Nar Kokës i duhen bërë pyetje të tjera, mund t’i vëmë në dispozicion numrin e tij për t’ia adresuar ato vetë./Syri/