COVID-19, Okinava shpall gjendje të jashtëzakonshme

Prefektura japoneze, Okinava ka shpallur gjendje të jashtëzakonshme, për shkak të rritjes së numrit të rasteve me COVID-19. Guvernatori rajonal, Denny Tamaki, u bëri thirrje banorëve të këtij ishulli, që të qëndrojnë në shtëpitë e tyre gjatë dy javëve të ardhshme dhe se spitalet janë mbingarkuar pas rritjes së rasteve me COVID-19.

“Kemi parë rritje dramatike të infektimeve dhe kolapsimi i sistemit të kujdesit shëndetësor duhet të parandalohet me çdo kusht,” tha ai për mediat lokale.

Okinava ka raportuar dje për 71 raste të reja me COVID-19, teksa numri i përgjithshëm i rasteve ka arritur në rreth 400.

Gjysma e të infektuarve janë personel në bazën ushtarake amerikane që gjendet në këtë ishull.

Gjendja e jashtëzakonshme, që hyn në fuqi më 1 gusht, raporton RFE, do të jetë për një periudhë 15-ditore, tha guvernatori Tamaki.

Ndërkaq, në mbarë territorin e Japonisë, disa masa kufizuese do të rivendosen nga java e ardhshme, pas rritjes së numrit të të infektuarve.