Davos, Vuçiç e fton Abazoviçin në nismën serbe “Ballkani i Hapur”

Presidenti i Serbisë, Aleksandar Vuçiç, e ftoi kryeministrin e Malit të Zi, Dritan Abazoviç, që t’i bashkohet nismës serbe të ideuar nga vetë ai, “Ballkani i Hapur”, e cila do të mbahet në Ohër të Maqedonisë së Veriut.

Sot pas takimit që zhvilloi në Davos ku të dy liderët po marrin pjesë, Vuçiç bëri të ditur se kishte ftuar Abazoviçin në takimin e “Ballkanit të Hapur” e ky i fundit thekson se marrëdhëniet me Serbinë janë prioritet për Malin e Zi.

“Edhe një mundësi e shkëlqyer për të diskutuar çështje dypalëshe me Dritan Abazoviçin gjatë Forumit Ekonomik Botëror, por edhe për ta ftuar edhe një herë që të bashkohet me ne në takimin e nismës së ‘Ballkanit të Hapur’ në Ohër,” tha Aleksandar Vuçiç përmes rrjetit social Instagram derisa Abazoviç përmes rrjetit social Twitter shton:

“Mali i Zi po bënë përpjekje maksimale që në Ballkanin Perëndimor të promovoj politikën e bashkëpunimit rajonal, pajtimit, bashkëjetesës, lidhjes më të mirë ekonomike. Marrëdhëniet me Serbinë, prioritet, jemi të gatshëm për bashkëpunim intensiv në të gjitha fushat, për interesa të përbashkëta,” thekson Abazoviç duke folur për takimin me Vuçiçin i cili u zhvillua në Forumin Ekonomik Botëror në Davos të Zvicrës.

Ndryshe, mëngjesin e sotëm ka filluar punimet paneli “Dialogu i Diplomacisë për Ballkanin Perëndimor” në kuadër të Forumin Ekonomik Botëror në Davos ku përveç Vuçiçit dhe Abazoviçit merr pjesë edhe kryeministri i Kosovës, Albin Kurti, i cili kundërshton “Ballkanin e Hapur” si iniciativë të dëmshme jo vetëm për ekonominë shqiptare por edhe integrimin europian.

Nismën serbe “Ballkani i Hapur” e ka kundërshtuar paraardhësi i Dritan Abazoviçit, Zdravko Krivokapiç duke e konsideruar të vlefshme për bashkëpunim rajonal por të dëmshme për ekonominë e Malit Zi, mendim i cili përkon edhe me atë të Bosnje Hercegovinës!