Dëbimi i gylenistëve/ Haradinaj: Për rastin e turqëve jam njoftuar pasi ndodhi deportimi…

Kryeministri i Kosovës, Ramush Haradinaj, ka sqaruar sot para Komisionit Hetimor Parlamentar për ndriçimin e rastit të dëbimit të gjashtë shtetasve turq më datë 29 mars 2018 për deportimin e shtetasve turq u informua pasi ndodhi rasti.

“Hera e parë që unë e kam marrë telefonatën dhe njoftimin mes orës 11:00 dhe 12:00,” tha Haradinaj duke treguar se ishte në mbledhje të Qeverisë kur i është bërë një telefonatë dhe është pyetur për rastin.

Më pas, Haradinaj sqaroi se pse kishte kërkuar që ministri i Brendshëm, Flamur Sefaj, dhe drejtori i AKI-së, Driton Gashi të lirojnë postet e tyre.

“Më datën 29 unë iu kam drejtuar edhe ministrit Sefaj dhe drejtorit të AKI-së, zotit Gashi, dhe kam kërkuar raportim të plotë. Ka qenë obligim i tyre që të më informonin para se të ndodhte,” tha Haradinaj duke menduar se për shkarkimet kishte edhe mbështetjen e liderëve të tjerë institucionalë.

Haradinaj nuk ka dashur që mbledhja të mbahet me dyerë të mbyllura.

“Nuk kemi paraparë ndonjë material të tillë të ndjeshëm, që të jetë mbledhja e mbyllur,” tha ai.