Denoncimi, Berisha: 200 mijë qytetarëve iu hoq e drejta e votimit për arsye politike!

Mbi 200 mijë zgjedhës shqiptarë u përjashtuan ditën e votimit, duke u transferuar në qytete të tjera, në zona të tjera, pa asnjë paralajmërim dhe në kundërshtim me çdo ligj të vendit, tha Kryetari i Partisë Demokratike, Sali Berisha, duke saktësuar se 200 mijë prej tyre, e drejta e votimit iu hoq për arsye politike.

“Blerja e votës nuk u shfaq për herë të parë në farsën e vitit 2023. Ajo është denoncuar nga shqiptarët, mediat shqiptare dhe ndërkombëtare, komisionet e vëzhgimit dhe në raste të tjera.

Por, në këtë farsë, si kurrë më parë, ndërhyrja ishte e atyre përmasave të tmerrshme sa rrëzoi euron, monedhën më të fuqishme të Europës, në nivele që ajo nuk i kishte përjetuar kurrë më parë.

Pra, ky është një tipar i industrisë mafioze shtetërore të blerjes së votës.

Por, farsa elektorale e majit 2023, gërshetoi në mënyrën më të shëmtuar dy stile të farsave elektorale. Stilin e narkoshtetit dhe mafies së tij me stilin Putin, i cili parakupton përdorimin e të gjitha mjeteve të shtetit për kontrollin e votës së lirë të qytetarëve dhe ndryshimin e rezultateve.

Në dallim nga zgjedhjet e mëparshme, në këto zgjedhje u rikthye me të gjithë pasojat e shëmtinë e tij, loja me listat e votimit, përjashtimi i zgjedhësve nga qendrat e votimit nëpërmjet listave të votimit.
PD e denoncoi publikisht aktin kriminal elektoral të Edi Ramës dhe ministrit të familjes së tij, Çuçi, të cilët ndryshuan qendrat e votimit të 1.3 milionë zgjedhësve.

PD e denoncoi këtë akt si një përpjekje brutale për t’u mohuar të drejtën e votës sipas bindjeve politike qytetarëve shqiptarë.

Dita e votimit ishte ditë e përjashtimit të më së paku mbi 200 mijë zgjedhësve shqiptarë. Emrat e tyre ishin transferuar në qytete të tjera, në zona të tjera. Pa asnjë paralajmërim dhe në kundërshtim me çdo ligj të vendit.

Vetë KQZ pohon se për këtë shkak nuk votuan ditën e votimit 180 mijë shqiptarë, të zgjedhur me garanci të plota në bazën e kriterit të bindjeve politike,” tha Sali Berisha duke e cilësuar gënjeshtër të rëndë manipulimin me pjesëmarrjen e ulët kur 180 mijë qytetarë nuk u lejuan të votojnë.

“Mediat, të cilat për fatkeqësinë e tyre, bëjnë do të thosha një zhurmë shumë të dëmshme për shoqërinë, të cilat përpiqen të sfumojnë dhe zhurmojnë megakrimin elektoral të përmasave të papara kurrë ndonjëherë të farsës elektorale të vitit 2023, në mënyrë shumë superficiale interpretojnë se pjesëmarrja më e ulët se në vitin 2021, vjen për shkakun se opozita nuk pati alternativë.

Nuk ka gënjeshtër më të rëndë se kjo.

Opozita dhe të gjitha kronikat e medieve gjatë fushatës faktojnë se opozita ishte alternativë dhe kishte alternativë për çdo bashki të Shqipërisë sa asnjëherë tjetër.

Kandidatët e opozitë, të armatosur me alternativën e tyre, kërkuan ballafaqim me kandidatët e narkoshtetit që nuk dolën kurrë.

Në majin e vitit 2023 e 1 milionë e 300 mijë zgjedhës. Në vitin 2021 votuan 1 milionë e 500 mijë zgjedhës. Votuan më pak, 200 mijë zgjedhës. 200 mijë prej tyre iu hoq për arsye politike e drejta e zgjedhjes.

Këto akte janë tipike për zgjedhje të tipit Putin. T’u heqësh qytetarëve të drejtën për të votuar përbën një akt kriminal armiqësor ndaj këtyre qytetarëve, ndaj opozitës dhe ndaj lirisë së vendit.

PD, e zotuar të mbrojë votën e qytetarëve, e konstatoi dhe e denoncoi te SKAP-i i partisë. SKAP-i i partisë e përcolli siç mori urdhër. Por ditën e votimit nuk votuan për shkak të listave 180 mijë qytetarë shqiptarë.
Siç e shihni, këto zgjedhje janë zgjedhje në të cilat u ndërmor çdo lloj mase, nga kërcënimi me revole në ballë, dhe e kemi paraqitur, te përjashtimi si në diktatura, te heqja e të drejtës së votës nga Edi Rama dhe regjimi i tij.”

Në fund, Kryetari i Partisë Demokratike u shprehë i hapur për debat, për negociata për bashkim me përjashtim të Bravës dhe Alibashës që janë të përjashtuar përfundimisht nga PD, e për këtë të fundit tha se vetëm sot Rama e shpërbleu me 220 mijë euro!

“Dy persona janë të larguar në mënyrë përfundimtare nga PD. Njëri është Lul Brava, tjetri është Alibasha që mori vetëm sot shpërblim nga Edi Rama, 220 mijë euro.

PD është e hapur për të gjithë të tjerët për debat, për negociata, për çfarë të dëshirojnë.

Por dy persona, pengje të Edi Ramës, u përdorën në mënyrën më të pamëshirshme për të goditur opozitën shqiptare.

Përsa i përket atij rezultati, unë u bëj thirrje t’i lexoni rezultatet me realizëm.

PD-së iu mohua logoja, PD-së iu mohua kryetari i koalicionit. E di si e bëri Edi Rama? Kur ringu ishte përgatitur për ndeshjen, me mekanizma alla-Putin, shpalli veten fitimtar duke mos lejuar kundërshtarin të futet në ring.

Por ajo nuk është fitore? Ajo është tmerr-fitore! Sepse pasojat sigurisht që ishin për PD-në, por më të rënda qenë për atë. Se ai parashikoi jo vetëm që ajo të ishte një kolpo asgjësuese, përfundimtare. Por në fakt u përball me të kundërtën,” tha Kryetari i Partisë Demokratike, Sali Berisha, duke përfunduar:

Me të gjithë aktet e tij kriminale, 510 mijë shqiptarë u ngritën mbi të gjitha dhe i thanë se opozita shqiptare është e pamposhtur.

Unë jam këtu për të thënë se këto zgjedhje janë një farsë elektorale e paprecedent.

Unë kam besim të plotë se shqiptarët do t’i japin përgjigjen e merituar. Ne jemi zotuar se do mbrojmë votën. Është gjë e paimagjinueshme kjo që bëjnë mediat, të cilat përpiqen të bindin shqiptarët se nuk është përgjegjës hajduti, por viktima.

Ky është një akt amoraliteti. Por ne qëndrojmë, ja ku jemi përditë në mbrojte të votës.”