Digjen edhe tre makina me targa RKS në veri

Policia e Kosovës ka njoftuar se mbrëmë pas mesnatës është raportuar se nga persona të panjohur janë djegur edhe tre makina  të cilat ishin të regjistruara me targa RKS.

Policia ka njoftuar se dy makina janë djegur në Mitrovicë  të Veriut dhe një në Zveçan. 

“Me 31 mars 2023 pas mesnatës, në veri të vendit është raportuar se nga persona të panjohur janë djegur edhe tre vetura që iu përkasin viktimave të nacionalitetit serb, të cilat kanë qenë të parkuara njëra në rrugën “Kral Milutin”- Zveçan, tjetra në rrugën “Ivo Lola Ribar”- Mitrovicë Veri, si dhe e treta në rrugën “Vlade Çetkoviç”- Mitrovicë Veri,” thuhet në njoftimin e Policisë së Kosovës.

Policia ka sqaruar se pas dy makinave të djegura të mërkurën në veri të vendit, mbrëmë pas mesnatës, iu është vënë zjarri edhe tre makinave të tjera, të cilat iu përkasin viktimave të nacionalitetit serb, e të cilat ishin regjistruar me targa të Republikës së Kosovës, RKS.

“Sikurse edhe në rastin e parë, edhe në rastin e dytë, pas pranimit të informacioneve, njësitet policore menjëherë kanë dalë në vendin e ngjarjes duke angazhuar njësitë kompetente policore, përfshirë forenzikën, të cilat kanë ndërmarrë të gjitha veprimet e nevojshme hetimore,” thuhet në njoftim.

Lidhur me rastin, sqaron njoftimi i Policisë së Kosovës, është njoftuar prokurori kompetent, me udhëzim të të cilit janë iniciuar rastet “zjarrvënie” për procedura të mëtejme hetimore.

Policia e Kosovës thotë se do të vazhdojë angazhimin e saj drejt hetimit dhe zbardhjes së rasteve të tilla, si dhe në ofrimin e sigurisë për të gjithë qytetarët pa dallim.