Digjet lokali i nënkryetares së Zveçanit

Nënkryetarja e komunës së Zveçanit, Natasha Tomaniç, ka bërë të ditur se një lokal në pronësi të saj është djegur në orët e para të 8 marsit.

Veton Elshani, zëvendësdrejtor i policisë për rajonin e veriut, tha se zjarri dyshohet se është shkaktuar qëllimisht.

“Veprimet hetimore janë duke u zhvilluar,” tha Elshani për RFE.

Natasha Tomaniç, që është nënkryetare e komunës së Zveçanit që funksionon sipas sistemit të Kosovës, tha për RFE, se zjarrvënia nuk ishte e rastësishme dhe dyshon se motivi është se ajo ka ndihmuar serbët në veri të Kosovës të punësohen në institucionet e Kosovës.

Aktivitetet e saj, tha ajo, nuk përshtaten me Listën Srpska, partisë më të madhe të serbëve në Kosovë që gëzon mbështetjen e Beogradit.

“Atëherë kam një pyetje për ta. Pse po luftojnë që të kthehen në institucionet e Kosovës, nëse ne që kemi hyrë në institucionet e Kosovës jemi tradhtarë?”

Dëmi i shkaktuar nga zjarri, tha Natasha Tomaniç, kap vlerën e disa mijëra eurove.

RFE ka dërguar një kërkesë për koment nga Lista Srpska lidhur me akuzat e bëra nga Tomaniç. Por, nga ky subjekt nuk janë përgjigjur.

Kjo nuk është hera e parë që pronat personale të pjesëtarëve të komunitetit serb, në komunat në veri të banuara me shumicë serbe, u vihet flaka.

Në vitin 2023 ishin djegur dhjetëra vetura, pasi pronarët e tyre i kishin konvertuar targat nga ato serbe në RKS – Republika e Kosovës.

Për shkak të çështjes së targave të makinave, pjesëtarët e komunitetit serb, me nismën e Listës Srpska u larguan nga institucionet e Kosovës në nëntor të vitit 2022.

Ndërkaq, pas zgjedhjeve të prillit të vitit 2023 në katër komunat në veri të Kosovës u zgjodhën kryetarë shqiptarë. Shumica e nënkryetarëve në këto komuna janë nga komuniteti serb.