Diskriminimi dhe bullizmi në shkolla, Parlamenti i lë detyrë Komisionerit për trajtim të veçantë

Parlamenti ka kërkuar nga Komisioneri për Mbrojtjen nga Diskriminimi që shkollat të jenë në fokus të veçantë gjatë këtij viti për të parë shkaqet e diskriminimit dhe ndërgjegjësimin për bullizmin, një fenomen në rritje.

Në pikën 5 të rezolutës nënvizohet se KMD duhet intensifikojë aktivitetin e tij për adresimin e shkaqeve të diskriminimit dhe ndërgjegjësimin kundër gjuhës së urrejtjes tek fëmijët duke rritur numrin e çështjeve të trajtuara ex officio (çështje të nisura me iniciativën e KMD-së) për bullizmin në shkolla.

Ndërkohë në një prizëm më të gjerë është kërkuar që institucioni të angazhohet veçanërisht në zonat rurale për të nxitur respektimin e parimit të barazisë dhe mosdiskriminimit, duke përfshirë minoritetet rome dhe egjiptiane, të moshuarit, njerëzit me probleme të shëndetit mendor, njerëzit me aftësi të kufizuara, veçanërisht gratë dhe vajzat që u përkasin këtyre grupeve, dhe të informojë Komisionin për Çështjet Ligjore, Administratën Publike dhe të Drejtat e Njeriut për natyrën e problemeve të diskriminimit të konstatuara në këto zona.

Po kështu është kërkuar të dorëzojë pranë Parlamentit një raport analitik në lidhje me shkaqet kryesore të rritjes së ankesave për të kuptuar nëse vijnë si rezultat i forcimit të kapaciteteve të KMD-së dhe rritjes së ndërgjegjësimit qytetar apo si rezultat i rritjes së formave të diskriminimit.

Sipas Parlamentit është e nevojshme që ky institucion të realizojë një studim me fokus shkaqet e diskriminimit dhe të pabarazisë gjinore duke e fokusuar analizën në fusha të veçanta dhe duke analizuar dhe paraqitur rastet sipas sektorëve dhe zonave gjeografike.

Në bashkëpunim me Avokatin e Popullit rezoluta kërkon të zhvillohen sipas një kalendari të përcaktuar aktivitete ndërgjegjësuese në sistemin arsimor të ulët dhe të mesëm për adresimin e shkaqeve të diskriminimit dhe ndërgjegjësimin kundër gjuhës së urrejtjes.

Po kështu të intensifikojë aktivitetin ndërgjegjësues përmes përdorimit të medies dhe formave të reja të komunikimit virtual, me qëllim nxitjen e respektimit të parimit të barazisë dhe mosdiskriminimit dhe informimin për rolin e KMD-së. Në pikën e fundit nënvizohet se duhet të ketë angazhim për adresimin në mënyrë proaktive të rasteve të diskriminimit politik në administratën e pushtetit vendor./Monitor/