Dita e Flamurit, Berisha betohet në Vlorë: Pashiçin shqiptar do e paketojmë në Beograd!

Pas homazheve pranë monumentit të pavarësisë në Sheshin e Flamurit në Vlorë, Kryetari i Partisë Demokratike, Sali Berisha u betua para varrit të Ismail Bej Vlorës, se Pashiçi shqiptar, që sapi vendosi kurorën aty, e ka të fundit, sepse shqiptarët do e paketojnë atë në Beograd, aty ku e ka vendin.

“Sot, mbarë shqiptarët, kudo që janë, përulen me mirënjohjen më të pakufishme, nderimin më të madh, para veprës së pavdekshme të Ismail Bej Vlorës, ditës së Flamurit Kombëtar, ditë e të gjitha ditëve të kombit shqiptar.

Me aktin e tij të një vizioni dhe kurajo të jashtëzakonshme, Ismail Bej Vlora, bëri të mundur ekzistencën e Shqipërisë dhe kombit shqiptar.

Pa këtë akt, Shqipërinë dhe shqiptarët i prisnin greminat, honet e historisë.

Sot, ata janë anëtarë të NATO-s, Kosova është e pavarur.

Por unë erdha këtu për t’u betuar para varrit të Ismail Bej Vlorës, se Pashiçi shqiptar, që sapo ka vendosur kurorën aty, e ka të fundit, sepse shqiptarët, në Shqipëri, Kosovë dhe kudo që ndodhen, do e paketojnë atë në Beograd, aty ku e ka vendin.

Tradhtar si ky, kombi nuk ka pasur ndonjëherë në histori.

Dhe ky është një zotim solemn përpara Babait të Pavarësisë se edhe njëherë, Pashiçi nuk do ketë vend në Tiranë, por të shkojë në Beograd te padroni i tij Vuçiç,” tha Sali Berisha duke përfunduar:

“Gëzuar qytetarë dhe qytetare të Vlorës, gëzuar shqiptarë dhe shqiptare kudo që jeni, këtë ditë të bekuar, këtë feste të të gjitha festave tona.

Rroftë flamuri ynë, nderim përjetë Ismail Bej Vlorës dhe etërve të pavarësisë.”

Ndryshe, edhe në ceremoninë shtetërore të këtij për nder të Ditës së Flamurit, Kryeministri Edi Rama nuk përfshiu asnjë pjesëtarë të opozitës, aq më shumë në mandatin e tij të tretë kur është i bindur se opozitën shqiptare e ka zhdukur të tërën!