Dita e Ujit të Bekuar/ Berat, hidhet Kryqi në lumin Osum. 9 të rinj…

Ndonëse në kohë pandemie dhe temperaturë të ulët, qyterarët e Beratit u bënë edhe sot më 6 Janar, u bënë pjesë e traditës së hershme të këtij qyteti në Ditën e Ujit të Bekuar, hedhjen e kryqit në lumin Osum.

Qysh në orët e para të mengjesit, beratasit shkuan në kishë dhe mbushën një shishe me ujë të bekuar, për ta përdorur ujin gjatë gjithë vitit. Më pas, priftërinjtë e Kishës Ortodokse në Berat, të gjithë të pajisur me maska janë nisur nga Kisha e “Shën Dhimitrit” drejt Urës së Goricës, për kryerjen e ritualit të hedhjes së kryqit.

9 të rinj beratas sfiduan temperaturat e ulëta dhe u futën në ujin e ftohtë të Osumit, për të pritur kryqin.

Ceremonia e hedhjes së kryqit u mbajt nga prifti Johan Qako, që pas ritualit fetar hodhi kryqin e bekuar në lumë. Kryqi u kap nga 21-vjeçari Daniel Lirza,i cili me kryqin në dorë depërtoi në mes të turmës.

Sipas traditës, 21-vjeçari troket derë më derë në portat e banesave të lagjeve: “Mangalem”, “Goricë” e “Kala” si dhe në lagjet e tjera beratase, ku “dorovitet” nga banorët.

I pranishëm në ceremoninë e hedhjes së kryqit në Berat ka qenë edhe Presidenti i Republikës, Ilir Meta.

Ndryshe, hedhja e kryqit simbolizon momentin e pagëzimit të Jezu Krishtit në lumin Jordan. Pagëzimi lindi si moment për të çliruar njeriun nga mëkati. Pagëzimi i parë ka ndodhur rreth 800 vjet para se të lindte Jezu Krishti, ky quhej pagëzim hyjnor (shpirtëror).