Ditë zie për Shqipërinë!
nga Tritan Shehu
Dita ndërkombëtare e demokracisë, ditë zie kjo për Shqipërinë!
Demokracia jonë në qoftë se nuk ka vdekur tashmë, është në agoni duke evokuar “reanimacionin” si të vetmen shpresë!
Jemi i vetmi vend në atë ku ne dëshirojmë e aspirojmë të klasifikojmë veten tonë, në “Botën Demokratike”, me një parlament karikaturë pupacësh 122-sh, ku çdo gjë lëviz nën “Shkopin e dirigjentit”!
Jemi i vetmi vend ku nuk ekziston “Qeverisja Lokale”, pikërisht ajo ku qytetari duhet të gjejë veten e tij.
Jemi i vetmi vend që prej vitesh nuk ka Gjykatë Kushtetuese e Gjykatë të Lartë.
Por ka edhe më keq akoma, në këtë gjendje institucionale ky “parlament” merr guximin të prekë Kushtetutën, e pa imagjinueshme kjo për çdo vend ku ka “filiza” demokracie, apo që përpiqet të transmetojë së paku imazhe demokracie.
Në këto kushte tragjike për vendin le t’i lëmë me një anë teorizimet demokratike, elaborimet e fjalës sublime “demokraci”, që po i lexoj sot!
Sot duhet ta kuptojmë qartë, ne dhe partnerët tanë, se Demokracia jonë ka nevojë për Ringjallje, ka nevojë për veprime e metoda reale “reanimatore”, që disa herë mund të duken edhe të “ashpra”, por janë të domosdoshme.
Ndryshe autokracia është shumë pak për çfarë na ofron e ardhmja!
