Donald Trump bie nga lista e 400 amerikanëve më të pasur
Ish-Presidenti i SHBA, Donald Trump nuk është më aq i pasur sa revista Forbes ta rendit në listën e 400 amerikanëve më të pasur.
Vlerësohet se aktualisht pasuria e Donald Trump është 2.5 miliardë dollarë, që e rendit 400 milionë dollarë nën kufirin e listës së këtij viti, raporton kjo revistë biznesi.
Pasuria ka rënë për 600 mln dollarë
Vitin e kaluar Trump ishte renditur si amerikani i 339 më i pasur, por Forbes tha se ai nuk është futur ndër 400 më të pasurit pasi pasuria e tij ka rënë për 600 milionë dollarë që nga fillimi i pandemisë. Sipas Forbes, aksionet teknologjike, kriptovalutat dhe pasuritë tjera kanë lulëzuar gjatë kohës së pandemisë.
“Por patundshmëria në qytetet e mëdha, që janë dhe pasuria kryesore e Trumpit, nuk kanë lulëzuar, duke e larguar Ish-Presidentin nga klubi kombëtar më ekskluziv,” shkruan Forbes.
Trump ishte në këtë listë që nga viti 1996, duke filluar nga numri 368. Nga viti 1997 deri në vitin 2016 kur është zgjedhur president, ishte në gjysmën e sipërme të listës së amerikanëve më të pasur. Por, rënia e tij filloi nga viti 2016, e që nga ajo kohë ajo filloi të bie në renditje deri sa doli fare.
Sipas vlerësimeve, Trump ishte në kulmin e pasurisë së tij në vitin 2015, kur Forbes e vlerësoi pasurinë e tij në 4.5 miliardë dollarë. Vitin e radhës pasuria e tij u vlerësua 3.7 miliardë dollarë, e nga viti 2017 deri në vitin 2019, 3.1 miliardë dollarë.
Trump disa herë është shprehur se kur ishte president kjo i ka kushtuar miliarda dollarë. Gjatë mandatit të tij, Trump i ka dorëzuar djemëve drejtimin e konglomeratit të korporatave të tij, por kompanitë kanë ngelur në pronësinë e tij.
