Dorëzohet Ilir Meta, teatri do të shembet…
Kuvendi ka miratuar ligjin për teatrin, përmes të cilit i hapet rruga shembjes së godinës aktuale dhe ndërtimit të një Teatri të ri, të paktën 6 kullave shumëkatëshe, në një sipërfaqe rreth 90 mijë metra katror. Ligji i miratuar në Kuvend me votat e socialistëve, i kontestuar nga opozita, shoqëria civile dhe aktorët e artistët, përcakton edhe firmën që do të kryejë punimet, çka për herë të parë në historinë e vendit, Parlamenti miraton një ligj të veçantë për një kompani.
Tashmë e gjithë beteja për shembjen ose jo të Teatrit ndodhet në tavolinën e Ilir Metës, Presidentit që në bazë të Kushtetutës i duhet të dekretoj ose jo ligjin. Në rast të dekretimit ai nis të zbatohet, pra Teatri shembet, ndërsa në të kundërt i rikthehet edhe njëherë Kuvendit për shqyrtim.
Parlamenti mbyll punimet në 23 korrik, ndërsa Presidenti ka afat ligjor për t’u shprehur deri në fund të muajit. Opozita e ka cilësuar këtë si një tërheqje të mazhorancës, duke marrë të mirëqënë faktin se Presidenti nuk do të dekretojë ligjin. Por nëse dekreti është pozitiv, pra Kreu i Shtetit firmos shembjen e Teatrit, atëherë gjithçka do të varet nga vullneti që do të ketë Edi Rama dhe Erjon Veliaj për të nisur zbatimin.
Një prej njerëzve të afërt të Presidentit Ilir Meta, eksperti i njohur i sigurisë, Ilir Kulla përmes një postimi në rrjet ka paralajmëruar atë që mund të ndodhë me Teatrin.
“PD iu kujtohet para 10 vjetësh kur ndryshuat kushtetutën bashkë me PS? Mos u ankoni sot kur Presidenti se ndal dot ligjin e Teatrit, ç’mbollet po korrni…”, shkruan Kulla në rrjetin social.
Duket se ky është sinjali i parë që i është dhënë artistëve, shoqërisë civile, por edhe PD-së që ka besuar dhe vazhdon të besojë në një veto Presidenciale për të bllokuar shembjen e Teatrit, që u kthye në një kauz politike.
Pafrike.al para disa ditësh paralajmëroi atë që mund të ndodhë nesër, pra qëndrimin e Kreut të Shtetit kundrejt ligjit që ka prodhuar protesta e reagime, manipulime votash në Kuvend dhe mund të çojë edhe në përplasje, sikundër është paralajmëruar nga protestuesit aktorë dhe artistë.
Por ajo çka ka ndodhur deri më tani, të paktën nga sa thuhet publikisht, përçarja e artistëve dhe aktorëve, duke u vendosur në kahe krejt të kundërta lidhur me atë që Teatri duhet apo jo të shembet, tregon se mazhoranca qeverisëse ka gati skenarin për të thelluar edhe më tej këtë, sikundër nuk do të krijohej ndonjë habi sikur nesër të kishte më shumë zëra pro shembjes sesa kundër saj.
Kulla në postimin e tij e lidhë pamundësinë e ndaljes së zbatimit të ligjit për Teatrin me ndryshimet Kushtetuese të 2008-ës, vit në të cilin me votat e PS-PD ndodhi edhe reforma më e madhe Kushtetuese në vend. Ndryshimi më i fortë kishte të bënte me kompetencat e Presidentit, i cili zgjidhet me një shumicë të thjeshtë votash, ndërsa roli i tij është thjeshtë një çertifikues. Në atë kohë i vetmi që kundërshtoi ndryshimet ishte pikërisht Ilir Meta që drejtonte LSI-së dhe disa deputetë të atyre që konsiderohen partitë të vogla. Madje për herë të parë në mjediset e Kuvendit u zhvillua një grevë urie, e cila nuk arriti të ndalonte projektin e PD dhe PS për ndryshimin e Kushtetutës.
Në fakt në atë kohë Meta nuk merakosej shumë për kompetencat e Presidentit, por për sistemin elektoral, që vinte në pikëpyetje ekzistencën e partisë së tij.
Sot që është President ndoshta ai ndjen mungesën e kompetencave krahasuar me Presidentët e para 2008, që të paktën kishin në dorë të tyre bllokimin e nismave të Kryeministrit, Kuvendit, pa pasur frikën e një shkarkimi nga detyra, për shkak të formulës së zgjedhjes. Me ndryshimet Kushtetuese të 2008 dhe zgjedhjen e Presidentit, në dy raundet e fundit me 71 vota, është mjaft e thjeshtë që Kreun e Shtetit ta vendosësh para opsionit të shkarkimit dhe zgjedhjes së një tjetër emri, ose çertifikimit të ligjeve apo nismave.
Prova e sotme ka vetëm një vlerë, a do ti qëndrojë apo jo Kreu i Shtetit deklarimit se nuk do të përkrahë shembjen e Teatrit? Ditët në vazhdim mund të japin një panoramë më të qartë të tepsisë, pasi timonin dihet se kush e ka.
