Përfundon takimi mes Vlahutin dhe artistëve/ Ja premtimi që marrin për Teatrin

Takimi mes ambasadores në ikje të Bashkimit Europian në Tiranë, Romana Vlahutin, dhe Aleancës për Mbrojtjen e Teatrit, ka përfunduar me premtimin se BE po shqyrton ligjin e miratuar me votat e socialistëve.

Në takimin me Vlahutin ishin Alert Çeloaliaj, Neritan Liçaj, Robert Budina, Adriatik Lapaj, Rudi Erebara, Sesilia Plasari.

Në dalje të këtij takimi Çeloaliaj u shpreh se ata kanë marrë nga Vlahutin konfirmimin se BE-ja është duke marrë në shqyrtim ligjin e kaluar në vend.

“Falenderoj ambasadoren Vlahutin që na priti në takim. Ia bëmë të qartë qëndrimet tona, se jemi kundër shembjes së Teatrit dhe projektit të PPP-ve. Ky nuk do të jetë takimi i fundit që ne do të kemi me përfaqësues të BE-së”, u shpreh Çeloaliaj, shkruan Fax web.

Çeloaliaj bëri më tej thirje për presidentin Ilir Meta, që ai të mos e dekretojë ligjin që u kalua pak javë më parë në Kuvend.

”I bëj thirrje presidentit Meta që të mos e dekretojë atë ligj, të bëhet garanti i Kushtetutës së vendit, sa kohë që Gjykata Kushtetuese është jashtë funksionit të saj”, tha Çeloaliaj.