Draftin e BE nuk e kam pranuar, Kurti deputetëve: Kurrfarë pranimi s’vjen në shprehje pa e parë ju!

Duke raportuar para deputetëve të Parlamentit të Kosovës për takimin e fundit në Bruksel në lidhje me dialogun Kosovë-Serbi, Kryeministri Albin Kurti tha se në dy vjet qeveri është arritur një marrëveshje që përfshin njohjen de facto të Kosovës nga Serbia ndërsa ka garantuar se Draft i propozuar nga Pesëshja e Madhe në përputhshmëri me Kushtetutën e Kosovës.

“Dialogu për normalizim të marrëdhënieve me Serbinë është një proces i cili ka nisur në mars të viti 2011. Një dekadë e dialogut solli marrëveshje të titulluar si: Marrëveshje e konkluzione. Por ajo që do të veçohej ishte marrëveshja e 19 prillit të vitit 2013 për Asociacionin e Bashkësisë së Komunave me Shumicë Serbe, e cila, me gjithë kundërshtimin e Lëvizjes Vetëvendosje e jo vetëm, e pati kaluar ky Kuvend me 2/3 në detyrim ligjor ndaj partnerëve ndërkombëtarë,” tha Albin Kurti duke vënë në dukje marrëveshjen e vitit 2015 që iu shtuan kompetencat e Asociacionit, të cilat Gjykata Kushtetuese i gjeti shkelje në 23 Nene.

Marrëveshjet tjera, thai ai, janë bërë nën supozimin për normalizimin e marrëdhënieve në mes të Kosovës e Serbisë, si dhe për integrimin e veriut të Kosovës, ndërsa vijoi të flas për procesin e dialogut që nga koha kur ai ka qeverisur me Kosovën.

“Nga marsi i vitit 2021, kur kemi marrë qeverinë, kemi thënë se na duhet një qasje e re në dialog, një qasje parimore si palë të barabarta, ku në qendër është njohja reciproke.

Për ne suksesi demokratik kontribuon edhe integrimi i veriut. Sundimi i ligjit na ka sjelle shpesh përballë kriminelëve por ai do të vazhdojë ky është dallim i madh me më herët. Marrëveshja siç edhe është thënë është për njohje de facto. Kemi arritur vetëm një marrëveshje qe sjell njohjen defacto dhe ky është rezultati i dy vjetëve dialog.

Marrëveshja bazike dhe Aneksi e ka njohjen defacto nga Serbia. Vetëm një nen ndërlidhet me trashëgiminë e dialogut. Pa Nenin 7 do të përfundonim vetëm në nenin 10 për marrëveshjet e kaluara. Në ketë drejtim në tetor kemi pritur 5 emisarët që sollën një plan për ecjen përpara që përfshin dhe një propozim për nenin 7-10 të marrëveshjes. Draftpropozimi është sjellë duke u shkruar me kujdes me germën e Kushtetutës. Draft propozimi parasheh që do të trajtohet nga Gjykata Kushtetuese,” tha Kryeministri Kurti duke e pranuar se ka ofruar ta nënshkruajë marrëveshjen bazë të 27 shkurtit, por se presidenti serb ka refuzuar.

“Para krerëve evropianë ne ofruam të nënshkruajmë marrëveshjen bazë të 27 shkurtit me gjithë aneksin zbatues të Ohrit të 18 marsit dhe propozimin për zbatimin e nenit 7 të marrëveshjes në lidhje me nenin 10, pra për idenë e vetëmenaxhimit. Nënshkrimi do të nënkuptonte pranim e për rrjedhojë zbatim, por pranimi do të thotë nënshkrim e vetëm nënshkrimi do të thotë pranim dhe garanci për zbatim”.

S’është “Zajednica” që parashikohej me marrëveshjet e vitit 2013/2015

Kryeministri Albin Kurti, para deputetëve të Kosovës tha se Draft i Statutit të BE-së nuk është “Zajednica” që e parashikonin marrëveshjet e vitit 2013/2015, madje është i bindur se ndërpret dhe trashëgiminë mosnjohëse të Kosovës që ishte çimentuar në marrëveshjet e 2013 dhe 2015.

“E para, drafti e ndërpret trashëgiminë mosnjohëse të Kosovës që ishte çimentuar në marrëveshjet e 2013 dhe 2015, pra drafti ka qartësi sa i përket njohjes së Republikës si shtet i pavarur ku serbët do jetojnë në përputhje me aspiratat multietnike të Kushtetutës dhe pa qëllim tjetër minues për Republikën. Kjo qartazi nuk është Zajednicë ashtu siç e parashihnin marrëveshjet e viti 2013 dhe 2015 sepse asisoj do të ishte e padiskutueshme.

E dyta, drafti në vlerësimin tim politik e bën të qartë që mekanizmi që do themelohet do ketë karakter bashkëpunues, pra nuk do të ndërhyjë në kompetencat e pushtetit publik, të komunave, organeve qendrore, askujt.

E treta, drafti e mbyll hapësirën e përdorur nga Serbia që serbëve në Kosovë t’u projektoj një të ardhme jashtë kufijve të Kosovës apo në mosnjohje të kufijve të Kosovës, rrjedhimisht të jetonin me ndjenjën e imponuar nga Beogradi për luftë për territor, shkëmbim territorial a bashkim me këdo tjetër. Drafti e bën të qartë që çfarëdo ndryshimi i statutit bëhet vetëm pasi të jetë pajtuar Ministria për Administrimin e Pushtetit Lokal dhe t’i ketë dhënë aktgjykim lejues Kushtetuesja. Kjo e përmbys atë që e bënin marrëveshjet e viteve 2013 e 2015,” është shprehur Kryeministri i Kosovës duke e thënë qartë se nuk e ka pranuar Drafti e Statutit të BE-së për Asociacionin e komunave më shumicë serbe dhe pranimi nuk vjen në shprehje pa e parë atë deputetët e Parlamentit të Kosovës.

“Të gjithë ata që kanë thënë se e kam pranuar draftstatutin. Një draft të tillë unë nuk e kam pranuar ende dhe kurrfarë pranimi nuk vjen në shprehje pa e parë ju,” është shprehur Albin Kurti duke shtuar se nuk e kupton pse Presidenti i Serbisë, Aleksandar Vuçiç, ishte i gatshëm ta nënshkruaj Asociacionin me dy ish-kryeministra të Kosovës, e nuk po është i gatshëm ta nënshkruajë me të.

“Unë nuk e kuptoj Presidentin e Serbisë që ka qenë i gatshëm të nënshkruaj Asociacionin me dy kryeministra të Kosovës pse nuk e bën të njëjtin gjë tash me mua. Serbia ose ta pranojë nënshkrimin ose të pranojë që nuk është e interesuar për një Asociacion. Më 26 tetor ka treguar se nuk është e interesuar për një Asociacion.

Ai ka nënshkruar edhe me LDK-në edhe me PDK-në, aman tregomëni qysh ia keni bërë ju që ai nënshkruante me juve. Me mua po ik s’po nënshkruan. Me dialogun e juaj ai ishte konstant, e në Kosovë mbaheshin zgjedhje, e tash ne jemi konstant e në Serbi mbahen zgjedhje,” është shprehur Kryeministri Albin Kurti duke raportuar para deputetëve të Parlamentit të Kosovës me shumë seriozitet e që rezultoi se rivalët e tij kishin ardhur të bëjnë politik dhe jo të informohen se çfarë ka ndodhur me dialogun Kosovë-Serbi në takim me liderët evropian .