Drejt BE-së, luftë korrupsionit me Rezolutë dhe Abstenim!
Duke u mbështetur në gjetjet dhe rekomandimet e shprehura në Raportet e BE dhe Raportin screening të Komisionit Evropian, të cilat kërkojnë një analizë të përbashkët objektive, një reagim dhe veprim të përbashkët institucional, të vetdijshëm për domosdoshmërinë e njohjes së problematikave të vendit në këtë fazë vendimtare për anëtarësimin në Bashkimin Evropian dhe adresimin e përbashkët të prioriteteve veçanërisht në drejtim të mirëqeverisjes, sundimit të ligjit dhe korrupsionit, mazhoranca më e korruptuar në Evropë vendosi të avancoj në luftën kundër korrupsionit pas dorëzimit të disa ish-ministrave, me një Rezolutë të fuqishme e cila është kalitur në bodrumet e partisë duke nxjerrë dhe kuadrin e denjë që mund të drejtoj Komisionin e Posaçëm që ideoi kjo parti kriminale, për ta luftuar korrupsionin në rrugën drejt BE, njërin dhe të vetmin madje konsensual për ndërkombëtarët, ish-hetuesin e Sigurimit dhe vëllain e trafikantit ndërkombëtar të drogës, Fatmir Xhafa!
Për të mbajtur premtimin e kreut të kësaj mazhorance më të korruptuar prej se ekziston shteti shqiptar, Edi Rama, u kujdes opozita duke mos votuar kundër, por, me një abstenim që të kënaq orekset e të gjithë atyre që do ta luftojnë korrupsionin me Rezoluta, në mënyrë që të kenë arsyet dhe ti shtojnë ca presje Raportit ndërkombëtar të radhës që e përafron Shqipërinë në BE!
E qytetari shqiptar që vazhdon e korrupton për të zgjidhur problemet e tij sociale, shëndetësore dhe të biznesit, sot, me Rezolutë në dorë tashmë të miratuar e kupton se thjeshtë duhet të bashkëjetojë sepse për ta luftuar korrupsionin nuk e ka kush mendjen me ose pa Rezolutë.
Nëse mazhoranca sot ka Rezolutën për të luftuar korrupsionin, për të cilën opozita abstenoi, e ku thuhet se Parlamenti i Shqipërisë angazhohet të përmirësojë rolin e tij ligjvënës, monitorues dhe mbikqyrës në funksion të mirëqeverisjes në të gjitha nivelet, ekzekutive dhe ligjbërëse, qendrore e vendore, përmes mekanizmave dhe rregullave që fuqizojnë respektimin e ligjit dhe rritjen e transparencës në vendimarrje, si do ta luftoj kur pas çdo transparence që i është bërë vendimarrjes në çdo nivel, vetëm ata që kanë marrë vendime dhe kanë firmosur “fap-e-fap” nuk kanë dalë para drejtësisë, pse do të dalin me Rezolutë në dorë!
Pse duhet një Rezolutë për të luftuar korrupsionin në nivel qendror kur ende nuk e kemi një përcaktim të qartë pse këtë “luft” nuk e bëri SPAK dhe Drejtësia e Re, arsye për të cilën u krijuan! Rezoluta mund të hesht për këtë çështje por mbledhja e djeshme e KLP, poashtu organ i Drejtësisë së Re, dhe akuzat që u dëgjuan nga debati që u zhvillua, tregoi se në këtë Drejtësi kemi njerëz të partisë dhe të ndërkombëtarëve por jo dhe njerëz që luftojnë krimin e korrupsionin; Ose, dhe, që e mbrojnë atë!
Parlamenti zotohet se me këtë Rezolutë do të angazhohet të përmirësojë rolin ligjvënës, monitorues dhe mbikqyrës në funksion të mirëqeverisjes në nivel vendor, por shqiptarët nuk panë deri më sot se dikush u ndëshkua pse këto mekanizma nuk funksionuan dhe shumica e Kryetarëve të Bashkisë rezultuan hajdut duke përfunduar në SPAK e GJKKO; Të mos flasim pastaj që nuk u shënua asnjë rast i kthimit të miliarda lekëve të vjedhura edhe kur vjedhja u dokumentua para organeve të Drejtësisë së Re!
Sikur Rezoluta të përcaktonte si domodoshmëri jetike për luftën kundër korrupsionit e fenomenit të pandëshkueshmërisë në të gjitha nivelet, drejtimin e Komisionit të Posaçëm nga deputetë e opozitës dhe jo mazhorancës që edhe sot që është miratuar rezoluta vazhdojnë e vjedhin, ashtu siç është përcaktuar qartë zbatimi i objektivave të Strategjisë kombëtare antikorrupsion, shoqëruar me rekomandime masash konkrete ligjore, institucionale dhe administrative veçanërisht për kadastrat dhe të drejtat pronësore, taksat, doganat, arsimi, shëndetësia, përdorimi i fondeve publike, prokurimet publike, infrastruktura publike, etj, sot Rezoluta do të kishte kuptim! Por, kur këtë nuk e artikulon as opozita, situata bëhet edhe më e rëndë, pavarësisht fjalimit emotiv që mbanë Kryeministri i Athinës, Milanos dhe gjithë Shqipërisë!
Dhe jo vetëm kaq! Kur Rezoluta mendon të thellojë përpjekjet për forcimin e zbatimit të ligjit duke synuar reformimin, siç veproi mazhoranca me Reformën në Drejtësi, edhe të agjencive të tjera të zbatimit të ligjit që kanë në përgjegjësi luftën ndaj korrupsionit në të gjitha nivelet e qeverisjes dhe administrimin e pasurisë publike, krimin ekonomik, parandalimin e pastrimit të parave, deklarimin dhe kontrollin e pasurive të zyrtarëve dhe konfliktit të interesit, auditimin dhe inspektimin financiar, kontrollin e brendshëm, informalitetin apo të mbikqyrjes së tregut, të rregjistrimit e administrimit të pronës etj. atëherë motivimi, integriteti, përgjegjshmëria, llogaridhënia dhe efikasiteti më i mirë i këtyre strukturave do të përfundojë, jo në Komisionin e Posaçëm, por në Asamblenë e Partisë Socialiste, siç përfundoi SPAK!
Në fund, për të qenë korrekt, këtij Parlamenti i duhet pranuar sinqeriteti për detyrimin që merr përsipër me angazhimet e kësaj Rezolute, pavarësisht dallimeve dhe vijave të qarta ndarëse politike e programatike; Mesazhi është i qartë për të gjithë shqiptarët që u dyzuan në dallimet e shfaqura në seancë plenare mes atyre që ishin kundër dhe abstenuan!
Gjithsesi, derisa deputetët ngelën me Rezolutë në dorë për të luftuar korrupsionin, shqiptarëve u ngeli xhepi i tyre për ta parë se kush do të vazhdoj ta zbrazë, Rezoluta e Edi Ramës apo qeveritari i tij, siç bëri për sot e 11 vjet!
