Drenicë, Bekim Jashari: Vuçiç nuk mund të kalojë pa kërkuar falje!

Derisa vazhdon debati Vuçiç-Policia e Kosovës lidhur me vizitën e Presidentit të Serbisë në Banjë të Drenicës, Kryetari i Skënderajt, Bekim Jashari, i dërgoi një mesazh nga protesta kundër vizitës së Aleksander Vuçiçit në fshatin Banjë të Drenicës.

“Kjo është protestë e qetë e qytetarëve, tani sa dola për të parë nga afër situatën. Protesta është organizuar nga qytetarët dhe shoqatat e dala nga lufta. Kemi 15 mijë të vrarë, 1600 të zhdukur. Unë solidarizohem me qytetarët e komunës sime që nuk mund të kalojë presidenti serb pa kërkuar falje, për viktima dhe masakrat që kanë ndodhur gjatë viteve 98-99. Si kalon në Drenicë sikur nuk ka ndodhur asgjë, kjo s’ka kuptim”, ka thënë Jashari.

Vizita e Vuçiçit në Banjë ishte parashikuar të realizohet në orën 9:15 ndërkohë për shkaqe sigurie kryeministri i Kosovës, Ramush Haradinaj e ka anulluar këtë vizitë.