Dritan Abazoviç: Kemi rënë dakord për Qeverinë e re të Malit Zi

I mandatuari për formimin e Qeverisë së re të Malit të Zi, Dritan Abazoviç, bëri të diturs sot se është rënë dakord për përbërjen e Qeverisë së re.

Duke folur në një konferencë për media në Podgoricë, lideri i Lëvizjes Qytetare URA, Dritan Abazoviç, tha se e ka njoftuar Parlamentin e Malit të Zi për marrëveshjen e arritur për zgjedhjen e Qeverisë së re.

Ai tha se kabineti i tij do të ketë mbështetjen e 46 deputetëve nga 81 sa ka gjithsej Parlamenti i Malit të Zi.

“Ideja është që ta zhbllokojmë Malin e Zi, që shteti të ketë institucione funksionale dhe stabilitet. Në vend që të grindemi, të kemi pajtim dhe të përpiqemi të ndërtojmë një perspektivë evropiane. Ne nuk jemi kundër zgjedhjeve, por jemi kundër zgjedhjeve pa institucione,” tha Abazoviç ndonëse nuk dha shumë detaje për përbërjen e kabinetit, por tha se nëse merr mbështetje në Kuvend, ai do të ketë 20 ministra dhe katër nënkryetarë.

Abazoviç tha se beson se seanca e Parlamentit, në të cilën do të zgjidhet Qeveria e re, do të mbahet javën e ardhshme.

Qeveria e re pritet të përbëhet nga Lëvizja Qytetare URA e Abazoviçit, Partia Popullore Socialiste, e cila është pro-serbe, Partia Socialdemokrate dhe partitë kombëtare të shqiptarëve dhe boshnjakëve.

Qeveria pritet të ketë mbështetjen parlamentare edhe nga Partia Demokratike e Socialistëve, DPS, e presidentit të Malit Zi, Millo Gjukanoviq.

Ky i fundit ka konfirmuar më 19 prill se DPS do të mbështesë Qeverinë e pakicës “pa asnjë interes apo pjesëmarrje në të”.

Duke folur për prioritetet e kabinetit të tij, Abazoviç tha se në fokus do të jenë: dialogu, reformat në drejtësi, shqyrtimi i vendimeve të diskutueshme të Qeverisë së mëparshme dhe vazhdimi i reformave të shërbimeve të sigurisë.

“Ndër prioritetet normative janë marrëveshja për bartësit e funksioneve gjyqësore, harmonizimi i rregulloreve gjyqësore me rregulloret e BE-së, Ligji për origjinën e pronës, i cili pret dritën jeshile të BE-së, reforma zgjedhore, rishikimi i gjendjes aktuale në arsim dhe kulturë, si dhe rishikimi i të gjitha vendimeve për personelin në këto fusha”, tha Abazoviq.

Ai shtoi se prioritete të tij do të jenë edhe Ligji për regjistrimin, rregullimi i marrëdhënieve me komunitetet fetare dhe shqyrtimi i iniciativave rajonale, me qëllim të anëtarësimit sa më të shpejtë në BE.

Ndryshe, mosbesimi ndaj Qeverisë së mëparshme të Malit të Zi, të udhëhequr nga kryeministri Zdravko Krivokapiç, është votuar më 4 shkurt ndërsa është mbështetur nga URA dhe DPS e Gjukanoviçit.

Abazoviç është propozuar për kryeministër të Qeverisë së re të Malit të Zi më 3 mars, nga presidenti Millo Gjukanoviç.

Qeveria e Krivokapiçit është formuar në dhjetor të vitit 2020 nga një koalicion mes Frontit Demokratik pro-serb dhe pro-rus, Demokratëve dhe Lëvizjes Qytetare URA.

Kjo Qeveri ka pasur një shumicë të ngushtë në Parlament – prej 41 deputetësh – por ka kthyer DPS-në në opozitë pas tri dekadash.

Dallimet në qëndrime midis partnerëve të koalicionit kanë nisur të shpërfaqen shumë shpejt pas formimit të tij dhe palët shpesh nuk kanë qenë të njëzëshme në vendime.

Pak ditë pas votimit të mocionit të mosbesimit ndaj Qeverisë, kryetari i Kuvendit të Malit të Zi, Alleksa Beçiq, udhëheqës i Demokratëve, është shkarkuar po ashtu.

Fronti Demokratik pro-serb dhe pro-rus dhe Demokratët kundërshtojnë zgjedhjen e Qeverisë së pakicës dhe kryesuesi i Parlamentit malazez nga Fronti Demokratik, Strahinja Bullajiç, dha dorëheqje.

Këto grupe politike konsiderojnë se zgjedhja e Qeverisë së re dhe formimi i shumicës së re parlamentare paraqesin shkelje të Kushtetutës dhe të vullnetit zgjedhor të qytetarëve. Fronti Demokratik dhe Demokratët kanë paralajmëruar protesta./RFE/