Kriza energjetike/ PD me ekspertë, Berisha: Çmimet nuk i rriti lufta në Ukrainë por vjedhja!

Shqipëria e ka potencialin për të mos e ndjerë shumë krizën nga lufta në Ukrainë, tha Ish-Presidenti Sali Berisha në tryezën me ekspertët e PD për krizen e sistemit energjetik shqiptar dhe keqmenaxhimin e sektoreve të tij, duke shtuar se çmimet janë rritur nga vjedhja dhe babëzia qeveritare.

Me këtë rast, lideri historik i Partisë Demokratike denoncoi skandalin e Edi Ramës me çështjen e gazifikimit të vendit si dhe atë të dyshes kriminale Vuçiç-Rama që pengoi vendosjen e sistemit unik të komandimit të sistemeve energjetike Shqipëri-Kosovë.

“Tani ky problem, në hijen e agresionit rus ndaj Ukrainës, ka marrë përmasa edhe më të mëdha. Shqipëria është vendi i vetëm në Europë që ka tre ose katërfishuar çmimin e energjisë për bizneset dhe premton të rrisë në mënyrë absurde çmimin e energjisë edhe për konsumatorët.

Shqipëria është vendi i vetëm që takson naftën mbi 1 euro dhe ka një prej çmimeve më të larta në Europë edhe pse prodhon 1 milion ton. Sigurisht Shqipëria nuk është një ishull, është pjesë e kontinentit. Me gjithë këtë, në rrafshin e energjisë dhe prodhimit të saj, Shqipëria është vendi që duhet të ndjente më pak se çdo vend tjetër, ndikimin mbi energjetikën e kontinentit të agresionit rus mbi Ukrainën.

Kjo mbasi energjia e saj në masën 96 deri 98 përqind është tërësisht ujore. Jo vetëm është ujore, por ajo prodhohet me kosto më të ulët se në çdo vend tjetër të kontinentit.

Së treti, prodhimi i energjisë në Shqipëri, gjatë vitit 2021 është më i larti në rekord historik, është rreth 9.8 miliardë kilovat/orë. Pra, duke pasur parasysh këto faktorë, dhe nëse analizojmë qëndrimin në menaxhimin e rezervës ujore të kaskadës, konstaton lehtësisht se shkaku më themelor i krizës energjetike në Shqipëri nuk është moti, nuk është lufta, por është absolutisht plaçkitja, grabitja, vjedhja në këto sipërmarrje.

Nuk besoj të ketë një vend tjetër që zbraz digat dhe shet energji me 42 euro në të njëjtën ditë kur në bursë ajo është 130 euro. Apo blen energji me 300 euro, në një kohë kur në bursë atë ditë është 150 euro. Pra kemi të bëjmë me një rritje çmimesh të diktuara tërësisht nga keqmenaxhimi dhe vjedhja.

Ai që shiti energji me 42 euro, ka ndarë para me blerësin. Sepse ky i fundit e ka shitur diku me çmimin e bursës. Pra kemi të bëjmë me një menaxhim kleptokratik të këtyre sipërmarrjeve publike, që de facto janë të falimentuara, pasi borxhi i tyre i ka kaluar 1 miliard euro,” tha Sali Berisha.

Por çfarë qëndron tjetër në themel të kësaj krize?

“Në themel të saj qëndron qëndrimi i papërgjegjshëm i kësaj qeverie, e cila në 9 vite, nuk ka siguruar një burim të vetëm energjie, përveç burimeve ujore të kontraktuara më parë. Në një kohë kur potencialet ishin të jashtëzakonshme. Në një kohë kur kjo qeveri trashëgoi kontrata për ndërtimin e 432 hidrocentraleve në mbarë vendin. Përparësia e saj absolute duhej të ishte diversifikimi i burimeve të energjisë elektrike. Rrallë të ketë një vend me potencial të tillë për diversifikimin e burimeve të energjisë elektrike,” tha Berisha duke denoncuar skandalin e mungesës së gazifikimit në vend duke saktësuar se kjo çështje është penguar për shkak të aferave korruptive ndërsa denoncoi edhe skandalin e dyshes kriminale Vuçiç-Rama.

“Shqipëria ka platformat e erës ndër më të fuqishmet në botë. Karaburuni është një nga platformat e erës më të fuqishme, po ashtu edhe gryka e Tepelenës, rrafshnalta e Pukës. Ka me dhjetëra zona që janë studiuar, por patën një tërheqje pasi u tërhoq BE nga subvencionimi i energjisë gri. Por më vonë u bënë sërish aktuale. Ka parqe gjigante erërash. Këto projekte janë studiuar vite e vite nga kompanitë,” tha Ish-Presidenti Republikës duke e quajtur edhe sot krim mjedisor projektin për hidrocentralin e Skavicës.

“Diversifikimi i energjisë për ne do mbetet përparësi absolute. Çmimi do rikthehet në ato nivele, me të cilin nuk ka të humbur. Shqipëria do jetë një vend shumë atraktiv për bizneset e huaja edhe për çmimet e energjisë.” 

Në fund, lideri historik i PD denoncoi bllokimin që Vuçiç i bëri ndërtimit të trurit dixhital të komandimit të sistemeve energjetike Shqipëri-Kosovë.

“Shqipëria dhe Kosova janë dy vende, që në rast se vendosin sistemin unik të komandimit të sistemeve energjetike, në rast se ndërtojnë trurin dixhital të komandimit të sistemeve energjetike, respektivisht kursejnë nga 20 përqind të energjisë. Në funksion të kësaj u ndërtua linja e energjisë Tiranë-Prishtinë. E bllokoi Vuçiçi për vite të tëra, derisa Angela Merkel i tha se do të shkëpusim nga sistemi evropian i transmetimit.

Kjo qeveri loz me falsitetin dhe fasadën. Nëse vendosim një ‘tru’ komandues që drejton portat e digave dhe furrat e TEC-eve në Kosovë, secili vend kursen të paktën 20 përqind të energjisë. Këta kanë ngelur te ‘abetarja’. Firmosën një marrëveshje për ‘abetaren’ të vënë në jetë në vitin 2011. Pra falsitet, falsitet dhe mashtrime.”