Dritan Abazoviç merr mandatin për formimin e Qeverisë së re në Mal të Zi 

Presidenti i Malit të Zi, Milo Gjukanoviç, propozoi për Kryeministër liderin e Lëvizjes Qytetare URA, Dritan Abazoviç, i cili tashmë ka mandatin për të krijuar Qeverinë e 43-të të Malit të Zi.

“Përfaqësuesit e Lëvizjes URA dhe partnerët e tyre politikë më kanë bindur pa mëdyshje se kanë shumicë parlamentare për zgjedhjen e Qeverisë së Malit të Zi. I bindur se është në interesin më të mirë të Malit të Zi që sa më shpejt të jetë e mundur të formohet Qeveria me kapacitet të plotë, veçanërisht për shkak të sfidave shtesë të sigurisë dhe politike të krijuara nga lufta në Ukrainë dhe reflektimi i saj në stabilitetin e rajonit tonë,,” thuhet në deklaratën e Presidentit të Malit Zi, Milo Gjukanoviç duke përfunduar.

“Pres që Parlamenti të mbajë një seancë dhe të vendosë për programin dhe përbërjën e Qeverisë me propozimin e të mandatuarit!”

Ndryshe, mandatimi i Dritan Abazoviçit për Kryeministër të ri të Malit Zi vjen pas një bisede telefonike që Presidenti Milo Gjukanoviç zhvilloi me Zv/Ndihmës Sekretarin amerikan të Shtetit dhe të dërguarin e Posaçëm të Shteteve të Bashkuara për Ballkanin Perëndimor, Gabriel Escobar. 

“Dakordësi e plotë për rëndësinë e rolit të Malit të Zi si anëtare e NATO-s dhe kandidate për anëtarësim në BE,” u shpreh dje përmes rrjetit social Twitter, Milo Gjukanoviç, pas bisedës telefonike që zhvilloi me Zv/Ndihmës Sekretarin amerikan të Shtetit, Gabriel Escobar, duke përfunduar:

“Dhe, kujdes të veçantë ndaj pasojave potenciale për stabilitetin e Ballkanit Perëndimor.”