Duhet t’i ruajmë nervat, Kurti: Bisedimet me LDK-në nuk janë të lehta!
Sot në takim me Qendrat e Lëvizjes Vetëvendosje, kryetari Albin Kurti përveç çështjeve organizative diskutoi edhe për situatën politike dhe ecurinë se bisedimeve për formimin e koalicionit qeverisës me LDK-në, për të cilat tha se nuk janë të lehta ndërsa kanë kaluar 98 ditë nga zgjedhjet e 6 Tetorit.
“Duhet t’i ruajmë nervat. Të punojmë e të angazhohemi, por me durim. Këto bisedime nuk janë të lehta. Edhe më të rënda na presin bisedimet në të ardhmen si qeveri me faktorë të ndryshëm. Sigurisht që kemi mundur e është dashur të arrijmë marrëveshje deri më tash. Pasnesër bëhen 100 ditë prej zgjedhjeve të 6 tetorit. Mirëpo, prej këtyre 98 ditëve, për përbërjen e qeverisë ne kemi biseduar vetëm pas certifikimit të rezultateve. 52 ditë ne i kemi humbur, duke pritur a po ia kalojnë pragun një partie ndonëse e kemi ditur që kjo nuk luan fare rol në renditjen e subjekteve tona, se kjo nuk mund ta ndryshojë fitoren e Lëvizjes Vetëvendosje. Së fundmi, unë jam ekspozuar dy herë në mënyrë të rrezikshme: me 26 dhjetor jam ekspozuar para dy milionë qytetarëve dhe gjithë deputetëve të Kuvendit, pa pasur marrëveshje me LDK-në; dhe, mandej në takimin te presidenti sërish u detyrova të shkoj pa marrëveshje me LDK-në, por së paku kisha gjysmën e kabinetit tim të bërë publik.”
Albin Kurti me këtë rast shprehu besimin se marrëveshja me LDK-në do të arrihet.
“Jam i gatshëm të takohemi përditë, edhe të mbyllemi në ndonjë vend derisa të merremi vesh, por këtë mund ta them për veten, jo për palën tjetër. Ajo që ne duhet të themi, e që nuk po e themi sa duhet, është se ne duhet të bëjmë të qartë se për çka qëndrojmë. Jo vetëm si liderë e si udhëheqës por edhe si qytetarë duhet ta bëjmë të qartë se ne nuk mund të kthehemi prapa, se ne nuk mund të bëjmë kompromis me të ardhmen dhe se asnjëherë nuk lodhemi e nuk do të lodhemi duke mbrojtur qëndrimet dhe parimet tona,” tha Kryetari i Lëvizjes Vetëvendosje, Albin Kurti, duke duke shtuar se nuk duhet një marrëveshje e shpejtë por e drejtë:
“Lodhjen nga pritja dhe frustrimi nga vonesat le t’i kthejmë në kërkesa, jo për marrëveshje të shpejtë dhe me çdo kusht, por për marrëveshjen e drejtë që na duhet për të bërë ndryshimin që duam.”
