Durrës, përfshihet nga flakët Urgjenca e Spitalit, evakuohen pacientët

Përfshihet nga flakët Urgjenca e Spitalit të Durrësit ndërkohë reagon dhe Policia e Shtetit duke sqaruar se bëhet fjalë vetëm për një shkëndijë. Por pamjet nga Urgjenca e Spitalit Durrës nuk flasin vetëm për një shkëndijë policeske!

Mësohet se zjarri ka rënë rreth mesditës në repartin e grafisë së Urgjencës, raporton BW, ndërsa pacientët janë evakuuar menjëherë.

Ndërkohë Policia e Durrësit njofton se bëhet fjalë vetëm për një shkëndijë

“Në lidhje me lajmin për rënie zjarri në Spitalin e Durrësit, ka pasur vetëm një shkëndijë, e cila është shuar dhe nuk ka asnjë problem.”

Që ishte shkëndijë tha edhe Drejtorja e spitalit, Nadire Jani, por shtoi se menjëherë janë evakuuar 7-8 pacientë, që ndodheshin tek Urgjenca.

“Situata është qetësuar. Kishte një shkëndijë elektrike në panelin që furnizon repartin e radiologjisë, ndoshta te grafia, dhe për këtë pati tym. Hoqëm pacientët, sepse tymi kaloi dhe nëpërmjet urgjencës, ishin 7-8 pacientë, që janë futur te neurologjia brenda të gjitha kushteve. Tani po ajroset ambienti dhe po sot do të vendoset në punë,” tha drejtorja Jani.

Pamje, që sjellë BW ku shihen momentet e evakuuimit të pacientëve në reparte të tjera vetëm për shkëndija nuk flasin, ndërsa mjekët e urgjencës theksojnë se situata është vënë nën kontroll.

“Fikja e zjarrit është bërë me fikëse. Reparti furnizon aparatet, grafi, skaner, etj. Pacientët janë evakuuar të gjithë nga urgjenca, nuk ka asnjë. Situata është vënë nën kontroll”, thekson një mjek ndërsa një tjetër shton:

“Pacientët janë transferuar në reparte të tjera. Ne e morëm vesh pak me vonesë, por morëm masa menjëherë, duke evakuuar të gjithë pacientët që ishin në urgjencë.”