E pashqetësuar, Ministrja Financave: Deklarata e FMN, të lexohet me vëmendje

Ministrja e Financave, Delina Ibrahimaj ka deklaruar sot se deklaratat e Fondit Monetar Ndërkombëtar, FMN, që dje kërkoi që të frenohen shpenzimet jo të domosdoshme dhe të tregohet kujdes me projektet e partneritetit publik privat, PPP, nuk janë shqetësuese.

“Deklarata e FMN duhet të lexohet me vëmendje. Ndamë një mendim të përbashkët me FMN që ekonomia ka ardhur në përmirësim, ka treguar stabilitet në përballimin e dy krizave, tërmetit dhe pandemisë dhe i ka të gjitha potencialet për të përballuar krizën energjitike nëse do të përmbahet në përmasat që parashikohet në tregjet ndërkombëtare”, tha Ibrahimaj duke hedhur poshtë akuzat e PD se normat e interesit të borxhit do të rriten duke rënduar edhe më tej xhepat e shqiptarëve.

“Banka e Shqipërisë nuk pret që të rrisë normat e interesit. Inflacioni në shtator ishte 2.5 për qind. Banka e Shqipërisë vlerëson se inflacioni duhet 3 për qind për ta garantuar rritjen ekonomike, që parashikohet të arrihet vitin e ardhshëm”, tha ministrja duke shtuar:

“Pagat janë rritur dhe do të vazhdojnë të rriten. Të ardhurat e disponueshme për familjet shqiptare kanë ardhur në rritje gjatë viteve të kaluara dhe do të vazhdojnë të rriten”.

Fondi Monetar në një deklaratë ditën e djeshme i kërkoi qeverisë shqiptare që të rrisë transparencës e shpenzimeve publike, ndërsa investimet publike tejet ambicioze të financuara me burime të brendshme (që nuk lidhen me tërmetin) duhet të moderohen.

FMN këshilloi që mbështetja buxhetore duhet të orientohet më mirë te personat që kanë më shumë nevojë. Gjithashtu, besueshmëria e buxhetit dhe kuadrit fiskal duhet të forcohet dhe rreziqet fiskale në rritje duhet të monitorohen dhe menaxhohen më mirë.

“Rritja e shpejtë e stokut të Partneriteteve Publike Private (PPP) —që pritet të arrijë në 50% të PBB–së në 2021, nga 33% në vitin 2018—kërkon dyfishimin e përpjekjeve për të forcuar menaxhimin e investimeve publike (MIP). Investimet publike të financuara me burime të brendshme (që nuk lidhen me tërmetin) janë rritur me shpejtësi që nga viti 2020. Sfidat kryesore përfshijnë mungesën e transparencës mbi tejkalimin e kostove dhe afateve fillestare dhe mosrespektimin e proceseve të miratuara të përzgjedhjes dhe miratimit të projekteve, përfshirë këtu kur PPP–të përdoren për të anashkaluar tavanet buxhetore afatmesme. Është e rëndësishme të forcohet kapaciteti e MFE–së për të vepruar në mënyrë pro–aktive, si një barrierë në përzgjedhjen e projekteve dhe të angazhohet në mënyrë aktive në proceset e vlerësimit dhe monitorimit. Duhet të bashkerëndohen proceset për projektet e financuara nga buxheti dhe PPP–të”, thuhet në deklaratë.

FMN kërkoi dhe më shumë transparencë për fondet e tërmetit. “Duhen masa për të rritur transparencën dhe llogaridhënien lidhur me shpenzimet e kryera me procedura emergjence. Këto masa duhet të zbatohen sa më shpejt të jetë e mundur, si dhe përdorimi i fondeve të rindërtimit duhet të jetë subjekt i kontrollove standarde të menaxhimit të financave publike” sugjeroi Fondi.

Më tej, deklarata e FMN-së, cilësoi “Mirëpresim publikimin e afërt të raportit të auditit të Kontrollit të Lartë të Shtetit për shpenzimet e lidhura me tërmetin dhe pandeminë në vitin 2020”./Monitor/