Edhe një rast, shkon në 22 numri i të prekurve me koronavirus në Kosovë

Edhe një rast me koronavirus është konfirmuar në Kosovë duke e çuar në 22 numrin e të prekurve nga COVID 19. Kjo është konfirmuar nga infektologu, Valbon Krasniqi.

“Mund të ju konfirmoj se e kemi edhe një të prekur me koronavirus. Është familjar i të infektuarve me kosonavirus nga Malisheva,” tha Valbon Krasniqi.

Ndërkohë nga Laboratori i Mikrobiologjisë Molekulare në IKSHPK, bëhet e ditur se me metodën RT-PCR, pasi janë testuar 5 mostra të dyshimta për virusin SARS-CoV-2, ka dalë se një prej tyre është pozitive.

Sipas IKSHPK-së, rasti i sotëm është rast kontakti nga Komuna e Malishevës, fshati Llashkadrenoc, i gjinisë mashkullore të moshës 67 vjeçare.

Instituti Kombëtar i Shëndetësisë Publike të Kosovës (IKSHPK) thotë se po e përcjellë me vigjilencë të shtuar situatën epidemiologjike me COVID-19, po monitoron të gjitha rastet e kontakteve dhe atyre të cilëve u është rekomanduar për vetizolim shtëpiak.