Edhe pagat e majit nuk ndryshojnë, ministrja Ibrahimaj shpjegon vonesat!

Edhe në maj pagat do të mbeten të njëjta, pavarësisht se Parlamenti miratoi reformën për rritjen e pagave për administratën publike.

Në një dalje për mediat ministrja e Financave dhe Ekonomisë Delina Ibrahimaj informoi se Këshilli i Ministrave miratoi në parim në mbledhjen e fundit 8 projektvendime që kanë si objekt zbatimin e kësaj reforme, pas miratimit të paketës ligjore nga Kuvendit në datën 25 Maj.

Me qëllim zbardhjen e plotë të vendimeve dhe zbatimin e tyre me korrektësi, Ministrja Ibrahimaj informoi se pagat e muajit për institucionet e administratës publike do të merren në nivelet që kanë qenë para miratimit të paketës ligjore nga Kuvendi.

Ndërkohë, me zbardhjen e vendimeve, të gjitha institucionet do të instruktohen për dhënien e shtesave të pagave për muajt maj dhe prill, në bazë një udhëzimi që Ministria e Financave dhe Ekonomisë është duke hartuar.

“Ne miratuam 8 vendime të Këshillit të Ministrave të cilat kaluan në parim, por patën disa diskutime dhe kjo është dhe arsyeja pse gjatë zbardhjes së këtyre vendimeve do të marrin pak më shumë kohë.

Duke qenë se janë mbi 200 institucione të administratës qendrore të cilat preken nga këto vendime, por janë edhe mbi 130 mijë të punësuar, duke bashkuar këtu dhe të punësuarit në shëndetësi, në arsim, në fushën e sigurisë, pagat e të cilëve u miratuan që në muajin prill, zbardhja e vendimeve dhe aplikimi i tyre merr një kohë më të gjatë.

Kjo është dhe arsyeja pse për të qenë më koherent dhe për të shkaktuar sa më pak vonesa në marrjen e pagave, ne i kemi kërkuar të gjitha institucioneve buxhetore që të përgatisin dokumentacionin e nevojshëm me qëllim që pagat e muajit maj, në fazën e parë, të kalojnë siç ishin para se të hynte në fuqi reforma.

Duke marrë në konsideratë këtu që disa prej institucioneve, në fakt titullarët e institucioneve që preken nga ligji që kaloi në Parlament, mund të aplikonin pagën e re, ne vendosëm që pagat në tërësi të kalojnë siç kanë qenë në muajin maj dhe ndërkohë me zbardhjen e vendimeve do të instruktojmë për dokumentacionin e nevojshëm, me qëllim që shtesat mbi pagë të aplikohen qoftë për muajin prill, qoftë për muajin maj.

Një tjetër domosdoshmëri kjo pasi ne jemi kujdesur gjithashtu që tatimi mbi të ardhurat paguar për shtesat mbi pagë të muajve prill dhe maj të jetë tatimi i duhur dhe të mos ketë një tatim të shtuar duke marrë në konsideratë se do të merreshin dy shtesa.

Të gjitha institucionet, me zbardhjen e vendimeve, do të instruktohen për dhënien e shtesave për muajt maj dhe prill, në bazë të listë pagesave të këtyre dy muajve, në bazë të një udhëzimi të Ministrit të Financave dhe Ekonomisë që po hartohet.”

Ministrja sqaroi ehde se si do të bëhet indeksimi i pensioneve.

“Indeksimin e pensioneve do të bëjmë për periudhën e paindeksuar. Vjet kemi marrë në konsideratë inflacionin e shtatorit, ndërsa të radhës do marrim indeksionin mesatar të shportës për pensionistët, nga tetori deri në shtator të vitit të ardhshëm. Aktualisht të gjithë transfertat i kemi të bazuara në pagën minimale. Kjo e fundit ka pasur një rritje të konsiderueshme”, deklaroi Ibrahimaj./Monitor/