Edi Rama gënjeu, PD: Nesër, Kolegji Zgjedhor nuk mund të shqyrtojë Dekretin e Presidentit!

Edi Rama gënjeu publikisht, kur pohoi për RFE se Gjykata Kushtetuese ka vendosur që kur aktet e Presidentit të Republikës lidhen me zgjedhjet, këto akte shqyrtohen nga Kolegji Zgjedhor. Kështu shprehet Partia Demokratike në reagimin e saj përmes Sekretarit për Çështjet Zgjedhore në PD, Ivi Kaso, duke shtuar se Kolegji Zgjedhor nuk merr dot në shqyrtim kushtetutshmërinë apo ligjshmërinë e Dekretit të Presidentit të Republikës.

“Ky është një mashtrim që nxjerr zbuluar skenarin e Edi Ramës për të ndërtuar një shtet privat, me institucione private, që marrin vendime në emër të interesave të pushtetit të tij kriminal dhe jo në emër të Republikës. Kolegji Zgjedhor nuk merr dot në shqyrtim kushtetutshmërinë apo ligjshmërinë e Dekretit të Presidentit të Republikës. Edi Rama mund të kontrollojë vendimmarrjen e Kolegjit Zgjedhor, mund t’i shantazhojë gjyqtarët e këtij Kolegji me vetting, por nuk e ndryshon dot realitetin se data 30 qershor nuk është më datë zgjedhjesh lokale në Shqipëri”, u shpreh ai

Në fund, Ivi Kaso ishte i prerë, se Kolegji Zgjedhor nuk ka kompetencë të gjykojë nesër këtë Dekret i cili është publikuar në Fletoren Zyrtare:

“Rolin dhe kompetencat e Gjykatës Kushtetuese nuk mund t’i marrë as Edi Rama, as kamikazët e tij në Komisionin Qendror të Zgjedhjeve, as Kolegji Zgjedhor, siç ka paralajmëruar Kryeministri i votave të vjedhura me krimin.”