Edi Rama ikën me largimin e Veriut, jo Saliut!
nga Agim Popoci
Situata e pashpresë që krijoi Edi Rama pas 10 vjet qeverisje si Kryeministër, 12 vjet si Kryetari i Bashkisë Tiranë dhe 2 vjet ministër i Kulturës, me vendimin e fundit të Gjykatës Kushtetuese dëshmoi se është rezultat i modus operandi të Sigurimit të Shtetit, që në këtë rast përmes individit Edi Rama ka arritur në pikun e konfliktit, sa situatën mund ta normalizoj paksa vetëm me propagandimin e idesë se si mund të ikë Edi Rama!
Dhe, sërish në kurriz të Veriut dhe Saliut: Pas largimit të Sali Berishës, ikën Edi Rama!
Duke e detyruar të dal nga goja e analistëve në studio televizive dhe lajmeve në TV kombëtare prej nga dhe u krijua “Gogoli Sali”, që pa diskutim janë që të gjitha nën kontrollin e Edi Ramës, “largimi i Saliut” u bë alfa dhe omega e zgjidhjes së gjithë problemit që ka sot Shqipëria ndonëse ajo u rrënua vetëm nga qeverisja e Kryeministrit Edi Rama!
Për të kuptuar veprimtarinë kriminale të Sigurimit të Shtetit dhe kavies së tij Edi Rama, na ndihmon libri i Berg, B.L. “Criminal Investigation” (McGraw-Hill), ku sqarohet se si modus operandi /Lexo shqip: Mënyra e funksionimit/ e të dyshuarit mund të ndihmoj në identifikimin, kuptimin dhe parandalimin.
Mënyra e funksionimit, është metodë e besueshme për evidentimin dhe kodimin e informacioneve, që zbulojnë shprehitë, tiparet ose praktikën e të dyshuarit për krim. Kjo, pastaj, mund të përdoret për ta kuptuar përfundimisht të dyshuarin, thotë Berg!
Të nisemi që nga shfaqja e pedagogut të Arteve, Edi Rama, kur ai kërkon varjen në litar të liderëve komunistë; Pra, jo përballje me drejtësinë dhe dënimin, por, litarin!
Pavarësisht se në atë rrëmujë ky njeri u shit dhe u pranua si intelektual, kjo mënyrë e funksionimit e ka përndjekur gjatë gjithë karrierës së tij politike duke filluar nga germat e para në gazetën e opinionistëve kriminel “Koha Jonë”!
Aty shohim filizat e parë të akuzës që nuk iu ndal Kryetarit të PD, Sali Berisha, deri sot: Saliu vrasës!
Pastaj e donin Saliun të vdekur se s’bënë, avancuan në akuza me sulmin e Jugut me veriorët e tij në SHIK, polici dhe ushtri, firmat piramidale, trazirat e vitit 1997, pushtimin e tokave me parullën e njohur “tokë e xanun”, nxjerrjen e foshnjës me thikë të një shtatzëne – grua kjo e një kryebashkiaku socialist, Gërdecin, 21 Janarin, ligjin 7501 dhe kryefjalën e akuzës Xenin, deri sa dora vetë Edi Rama u ul në fronin e Kryeministrit në vitin 2013!
Përkundër gjithë bëmave të tij ndërsa kishte lënë pas përvojë kriminale socialiste prej 2 vjet mandat ministri dhe 12 vjet Kryetar i Bashkisë Tiranë, çuditërisht nuk u dëgjua një analist socialist ose jo, të thotë se duhet të largohet Edi Rama që të ikë Sali Berisha, siç propagandohet sot; Duke mos harruar që në atë kohë Saliu kishte 13 vjet pushtet ndërsa Edi Rama 14 vjet!
Për fatin e keq të Edi Ramës, ai shkeli në Kryeministri me shollën e këpucëve përplot me m*t të Sigurimit të Shtetit që dikush duhej ti pastronte, meqë erdhën në pushtet, por, kishte një modus operandi që e përndiqte!
Zyrat dhe podrumet e pista të Kryeministrit ishin pjesë e humorit shqiptarë për Sali Malokun por jo dhe gjurmë serioze që t’i tregonte miletit që e gënjente, nga momenti kur u tha se ra komunizmi dhe Saliu erdhi në pushtet!
Të gjithë ishin në pritje të Saliut me pranga, për 21 Janarin dhe Gërdecin që ishin akuza të freskëta ose të paktën të birin Xenin, por rast pas rasti filluan ti bien akuzat me të cilat kishin helmuar miletin përkundër faktit se mediat vazhdonin ta mbështetnin tashmë Kryeministrin në detyrë!
Pasi e kuptoi se Amerika nuk është ajo që e kishte menduar dhe se pa atë nuk rrinë dot në pushtet, pranoi armët kimike! Për ti kënaqur zemrat e votuesve dhe ato amerikane, tha se i pranon këto armë dhe se do dërgoheshin Veri!
Pse në Veri, nuk ishte rastësi u konfirmua shumë shpejtë dhe kur situata i doli nga kontrolli me armë kimike, ai kishte të gatshëm ndëshkimin e radhës për Veriun në mënyrë që elektorati i tij vigjilent të bindej, se vërtetë Saliu nuk është arrestuar ende, por, çeçenët e tij po e njohin nën këtë pushtet, të zitë e ullirit!
Vuri traun në Rrugën e Kombit, pra, edhe për të lëvizur njerëzit e Saliut filluan të paguajnë, ama edhe ekzaltimi ishte i momentit sepse Saliu po lëvizte pa pranga në duar.
Pa dashje rezulton se “tokë e xanun” është ves i shqiptarëve të Jugut dhe jo vetëm çeçenëve të Veriut, dhe ende pa shpërthyer konflikti për pronën në bregdetin shqiptar, votuesit e ministrit të Brendshëm, Saimir Tahiri, në Unazën e Re, që kishin marrë garanci se edhe do ta legalizonin tokën e xanun socialiste ndërsa ishin kënaqur me terrorin ndaj Veriut, zgjohen me fadromat e Edi Ramës për t’iu shembur shtëpitë.
Kohë për protestë nuk kishte sepse nga trau i Rrugës së Kombit, Edi Rama erdhi në Unazën e re të për të shembur ose për të aplikuar modus operandi që e kishte njohur dhe e njehë që nga 29 Nëntori i vitit 1944!
Shumë shpejtë u konsumuan dy mandate qeverisëse, Saliu ishte i lirë, gjithashtu edhe Xeni ndërkohë ajo me të cilën mund të mburrej Edi Rama ishte vetëm vështirësia që u kishte shkaktuar qytetarëve në Veri të Shqipërisë duke i lënë pa investime fare!
Mandati tretë u fitua duke akuzuar sërish Saliun por ishte i ulur në një fron të përmbytur me koncesione të vjedhura dhe shërbim shumë më të keq se sa që e kishte marrë në vitin 2013!
Erdhi duke kërcënuar se nëse humb “Hëna do bëhet djathë” dhe për 10 vjet i bëri qytetarët të pajtohen që edhe Hëna t’u bëhet djathë, vetëm mos ta shohin me sy Edi Ramën, Kryeministër!
Duke mos gjetur dëshmi për akuza 30 vjeçare, Sigurimi i Shtetit nuk iu nda mënyrës së funksionimit dhe shpiku akuzën për Ish-Kryeministrin Sali Berisha, se ka favorizuar dhëndrin 15 vjet më parë, për një pronë ku ishte së bashku me 63 qytetarë të tjerë.
U rikthye dhe cingërima e prangave të dedikuara për Saliun në studiot televizive, shpëtimi i Shqipërisë dhe teoria se “Edi Rama ikën me largimin e Sali Berishës”!
Por, jo! Kjo tokë dhe ky komb shqiptar, njohu shumë akuza të paqena ose jo, shumë regjime kriminale, por, asnjë si ai komunist, madje dhe vdekjen e diktatorit pas së cilës asgjë nuk ndryshoi!
Sot, si po funksionon SPAK dhe GJKKO, dhe si stisen akuza dhe padi që i konfirmon pa pikë turpi edhe Gjykata Kushtetuese, askush nuk mund të jetë i sigurt se Sali Berisha nuk mund të përfundoj nën arrest; Por, kjo pak rëndësi ka nëse qoftë dhe një socialist është i bindur se Edi Rama ikën nëse largohet Sali Berisha!
Sot, kur nervi opozitar është djegur nga regjimi komunist, kur lideri opozitar trajtohet nga regjimi i Edi Ramës si bujkrob dhe situata në dukje të parë është e pashpresë, dhe, duke pasur parasysh urrejtjen patologjike të shfaqur ndaj Veriut, nga përcaktimi i modus operandi të këtij njeriu që fatin e tij e lidh me vuajtjen e Saliut, ka dhe një, por!
Po, Edi Rama mund të ikë, por, nëse largohet Veriu dhe jo Saliu!
Ai Veriu që pa traun e shtetit në tokë të vetë për të lëvizur, por, jo dhe në pjesët tjera të Shqipërisë!
Veriu që përmbytet për të pas drita Jugu dhe lekë xhepat e shpurrës së Edi Ramës!
Ai Veri që kur shkel në Milot, për të shkuar deri në Tiranën e largët vetëm 40 kilometra, sheh për 4-5 orë vetëm ferrin me sy!
Veriu që u akuzua për “tokë të xanun” dhe pa me sytë e përlotur se vetë Kryeministri e xani tokën e Teatrit Kombëtar dhe selisë së partisë së tyre të dashtun PD!
Ai Veri që strehon refugjatë afganë dhe tashmë edhe afrikanë në bregdetin e tyre të bukur, dhe nuk po sheh që e njëjta gjë po ndodhë edhe poshtë Fushë Krujës!
Veriu që pa reformën në drejtësi duke larguar prokuror dhe gjyqtar nga veriu i Shqipërisë edhe për 100.mijë lekë, dhe sheh mërtirë dhe ahmetër që vjedhin miliarda euro dhe SPAK e GJKKO bëjnë sehir! Dhe, me largimin e Veriut, kur Edi Rama do të detyrohet të ndryshoj modus operandi, do të vijë momenti që do ti duhet sqaroj njerëzit e vetë se kush ishte dhe është ai që vjedhë dhe vranë në këtë vend, kur malokët nuk do jenë më nën hyqmin e tij!
