Edi Rama mund të festoj për herë të tretë, por negociatat me BE nuk u çelën
Atë që e paralajmëroi shefi i diplomacisë gjermane, Heiko Maas më 8 Qershor në Konferencën e ministrave të jashtëm të vendeve të Ballkanit Perëndimor në kuadër të Procesit të Berlinit, sot u zyrtarizua nga ministrat e Jashtëm të BE në Këshillin për Çështjet e Përgjithshme në Luksemburg: Shqipërisë dhe Maqedonisë së Veriut nuk iu çelen negociatat me BE me presidencën portugeze dhe Konferenca e Parë Ndërqeveritare për dy vendet e Ballkanit pritet të mbahet gjatë presidencës sllovene.
“Pavarësisht të gjitha përpjekjeve, nuk ishte e mundur të arrihet marrëveshje për të negociuar për kornizën e Maqedonisë së Veriut dhe Shqipërisë dhe të mbahet Konferenca e Parë Ndërqeveritare me këto dy vende kandidate. Gjithsesi, Presidenca e ardhshme sllovene do të vazhdojë me përpjekjet me shpresën se do të arrijmë një konkluzion pozitiv së shpejti, mbi bazën e propozimit të Presidencës portugeze, që është në tavolinë,” tha Sekretarja e Shtetit për Çështje Evropiane e Portugalisë, Paula Zacarias.
Nëse Kryeministri Edi Rama ka bërë gati shampanjën mund ta hap se ka një sebep jo të vogël, Holanda nuk i doli kundër! Dhe, ishte vetëm vetoja e Bullgarisë nga e cila, zyrtarisht, pësoi Shqipëria.
Këtë e konfirmoi vetë Bullgaria përmes një komunikate të Ministrisë së Punëve të Jashtme, ku sqarohet se përfaqësuesi i saj në Samitin e Këshillit të BE-së, Zv/ministri i Jashtëm bullgar, Rumen Aleksandrov, ka bërë të ditura qëndrimet e palëkundura të Sofjes. Ministria e Jashtme bullgare thotë se e vlerëson vullnetin e mirë të Shkupit por pret që të zbatojë në praktikë detyrimet që ka marrë nga marrëveshja e vitit 2017:
“Kjo përfshin heqjen dorë të Maqedonisë Veriore nga pretendimet territoriale, të pakicave dhe historike ndaj Bullgarisë, ndryshimin e mbishkrimeve/monumenteve që nxisin urrejtje ndaj Bullgarisë në Maqedoninë Veriore, aktivizimin e një procesi të rehabilitimit të viktimave të komunizmit Jugosllav të shtypur për shkak të vetëdijes bullgare. Pavarësisht nga dialogu ynë dypalësh me Maqedoninë Veriore, Bullgaria këmbëngul që zbatimi i Marrëveshjes për Fqinjësi të mirë të përfshihet midis kushteve në kornizën e ardhshme për negociatat e pranimit të Shkupit në BE,” thekson Ministria e Jashtme e Bullgarisë ndërkohë Aleksandrov në Samitin e Luxemburgut shton se Sofja mbetet e hapur për të vazhduar dialogun konstruktiv për të gjetur zgjidhje.
Ndryshe, në kuadër të këtij Samiti, Serbia dhe Mali i Zi kishin Konferencat e Para Ndërqeveritare sipas metodologjisë së re të anëtarësimit. Edhe pse nuk kishte hapje të kapitujve të ri të negociatave me Podgoricën dhe Beogradin, Zacarias tha se ky është sinjal i mirë për lidhjen e BE meBallkanin Perëndimor në veçanti lidhur me meteologjinë e re të anëtarësimit.
