Edi Rama sulmon SPAK, Sali Berisha: Shkaqet janë madhore…

Pas sulmeve që Kryeministri Ed iRama i vazhdoi edhe sot ndaj organeve të drejtësisë, ka reaguar Ish-Presidenti Sali Berisha duke theksuar se këtë e bën për të tërhequr vëmendjen nga kriza ekonomike që ka kapluar vendin si dhe frika në palcë nga opozita e vërtetë.

“Në një panik të jashtëzakonshëm Rama merret me drejtësinë dhe kundërshtarët e tij politikë. Shkaqet janë madhore. Edi Rama beson se me këto qëndrime të cilat shëmbëllejnë apo janë të denja për Korenë e Veriut apo regjimin e etërve të tij, ka disa synime: së pari të tërheqë vëmedjen e qytetarëve shqiptarë të cilët po përballen me vështirësi shumë të mëdha në jetën e përditshme për shkak të këtij kryeministri I cili me firmë e vulë vetëm vjedh.

Shumica e familjeve shqiptare shpenzojnë mbi 50% të të ardhurave vetëm për ushqimet. Rritet çdo javë dhe çdo muaj në këtë vend në një kohë kur kryeministri dhe ministrat e tij të pangopur dhe përdorin fondet publike, pronat publike dhe asetet publike nga Kepi I Stillos deri në skajin tjetër,” tha Sali Berisha duke shtuar se aferat e Edi Ramës janë të panumërta dhe tashmë kanë shpërthyer nga të gjitha anët.

“Ju keni dëgjuar këto ditë për Butrintin. Ajo është një aferë multidimensionale. Rama mund të jetë aty aksioner, pasi miku i tij po ndërton resortin në Gjirin e Manastirit. Po ashtu në Kepin e Stillos është dhëna leja për 620 vila. Dy oligarkë të shëndetësisë fryhen dhe pasurohen me jetën e shqiptarëve: Vilma Nushi dhe Tom Doshi, të dy të lidhur si bloza me tymin me Edi Ramën.

Pra, shpërthimi i skandaleve të njëpasnjëshme kanë bërë që Edi Rama të humbasë arsyen, logjikën dhe të futet në sindromën e problemeve të thella psikike. I trembur,” tha lideri historik i PD duke thënë dhe një “pse” tjetër shumë të rëndësishme që është dhe frika në palcë nga opozita e vërtetë.

“Mori fund loja e turpshme me pseudo-pluralizmin, me opozitën e blerë, me opozitën-fasadë. Vendi sot ka një opozitë të vërtetë dhe kjo e tmerron Edi Ramën. E tmerron sepse kjo opozitë është revolucion. Ne, në mënyrë absolute nuk do pajtohemi me këtë plaçkitje të tmerrshme që po iu bëhet shqiptarëve. Ne nuk bëjmë presion as te SPAK, por iu drejtohemi qytetarëve të mbrojnë pronat nga një organizatë kriminale, nga më të rrezikshmet në botë,” tha lideri historik i PD duke paralajmëruar Edi Ramën:

“Këto ditë do jenë të harruara. Je i pashpresë, asgjë nuk e ndalon revolucionin pa i dalë zot interesit publik shqiptar. Asgjë. Sepse nuk do të ishte më opozitë, do ishte pseudo-opozitë. Ajo ka marrë fund dhe nuk ekziston më.”

Ka edhe një arsye tjetër në dezekuilibrimin e Edi Ramës, tha Berisha, ka mashtruar Departamentin e Shtetit dhe tani kërkon të hetohen shpifjet e tij.

“Ai është autori kryesor që ka mashtruar Departamentin e Shtetit për Sali Berishën. Nuk e them unë këtë, lexoni përgjigjen që DASH i ka dhënë një të përditshmeje shqiptare, ku thotë se burim i informacionit, përveç OJF-ve dhe medieve, kanë qenë raportet anti-korrupsion të qeverisë shqiptare.

Unë e besoj plotësisht këtë. Pra Edi Rama ka dërguar raporte në DASH, që nuk i ka publikuar kurrë, që nuk i ka dërguar dot kurrë në prokurori pasi janë fund e krye shpifje. Tani ai i thotë drejtësisë: hetoni shpifjet e mia. Hetoni se çfarë gënjeshtrash kam dërguar në DASH. Laku po i ngushtohet çdo ditë e më shumë sepse raportet e tij kanë qenë një shpifje fund e krye. Unë i them Edi Ramës, publikoi ato. Çoji të gjitha në SPAK dhe ku të duash.

E gjithë kjo fushatë ka për qëllim të mbulojë vjedhjet monstruoze që po dalin çdo ditë të Edi Ramës. Natyrisht ushtrojnë presion ndaj opozitës së vërtetë shqiptare, me të cilën e ka të humbur betejën. Për çfarë i duhet drejtësia Edi Ramës? Kundër kundërshtarëve të tij, kaq është.”

Edi Rama në çdo dalje publike kërkohn hetimin e Gërdecit dhe 21 Janarit ndonëse janë çështje të hetuara dhe të gjykuara, por sot Sali Berisha i kujton tërmetin e 26 Nëntorit 2019 duke e bërë përgjegjës Kryeministri Rama për 24 viktimat që humbën jetën në Thumanë ndërsa e konsideron “vrasje shtetërore, nga neglizhenca e pafalshme shtetërore”.

“Rama flet për afera, i them unë: Nëse ka afera të tmerrshme kriminale të pahetuara, janë 24 viktimat e Thumanës, të cilat i goditi tërmeti i parë dhe me të gjitha dokumentat, banesat e tyre ishin të pabanueshme.

Por papërgjegjësia e plotë e Edi Ramës, e Vangjush Dakos në Durrës bëri që ata të prisnin vdekjet në të njëjtat shtëpi, të prisnin tërmetin vdekjeprurës. Deri sot janë hetuar vetëm dy ish-kryetarë komune të PD në zona që nuk kishte dëmtime fare nga tërmeti. Asnjë njeri nuk është përgjegjës në kohën kur Edi Rama është përgjegjës direkt dhe më kryesor për vdekjet e tyre,” tha Ish-Presidenti Sali Berisha duke përfunduar:

“Vrasjet e Thumanës në këtë aspekt janë vrasje shtetërore, janë vrasje nga neglizhenca e pafalshme shtetërore. Dajoja i Taulant Ballës ishte drejtor në Kovalishencë. Aty humbi jetën një oficer i lartë i policisë. Dajoja është kthyer përsëri aty sepse ai është një nyje e rëndësishme e trafiqeve.”