Parlamenti miraton tri marrëveshje ndërkombëtare, njëra dështon sërish

Parlamenti i Kosovës ka miratuar sot në seancë plenare tri marrëveshje ndërkombëtare, teksa marrëveshja për “Projektin e reformës së sistemit të ndihmës sociale në Kosovë” nuk arriti të marrë 2/3 e votave të deputetëve.

Kështu, me shumicë votash janë ratifikiuar Marrëveshja ndërmjet Qeverisë së Republikës së Kosovës dhe Këshillit të Ministrave të Republikës së Shqipërisë për ndihmë të ndërsjellë juridike në çështjet civile dhe tregtare, Marrëveshja e kredisë ndërmjet Republikës së Kosovës dhe Bankës Evropiane për Investime për projektin e zhvillimit të impiantit të ujërave të zeza në Mitrovicë, si dhe Marrëveshja për kredi në mes të Republikës së Kosovës dhe Bankës Evropiane për Rindërtim dhe Zhvillim për projektin e trajtimit të ujërave të zeza në Mitrovicë.

Ndërkaq, Marrëveshja e financimit në mes të Republikës së Kosovës përfaqësuar nga Ministria e Financave, Punës dhe Transfereve dhe Asociacionit Ndërkombëtar për Zhvillim për “Projektin e reformës së sistemit të ndihmës sociale në Kosovë” ka marrë vetëm 63 vota deri sa ishin të nevojshme 2/3 e votave që ajo të konsiderohet e reatifikuar. Kundër kësaj Marrëveshje votuan 24 deputetë të opozitës.

Kjo marrëveshje edhe më herët nuk e ka gëzuar mbështetjen e 2/3-tave të deputetëve, sa nevojitet për t’u konsideruar e ratifikuar nga Kuvendi.