Ekuador, një nga kandidatët për president vritet në një tubim fushate

Një kandidat për president në Ekuador, i njohur për qëndrimet kundër korrupsionit, u vra në një tubim fushate në kryeqytetin e vendit, Kito. Presidenti i Ekuadorit, Guillermo Lasso sugjeroi se grupet e krimit të organizuar janë përgjegjëse për vrasjen, ndërsa vendi i Amerikës së Jugut është përfshirë nga një valë dhune mes bandave kriminale.

Presidenti i Ekuadorit, Guillermo Lasso konfirmoi vrasjen e kandidatit presidencial Fernando Villavicencio, i cili foli në një tubim fushate edhe për kërcënimet me vdekje që kishte marrë, si dhe për aktivitetin kriminal në vend përpara se të qëllohej.

“Më pyesin nga do t’i marr ato para? Por ky është një vend i pasur që nuk ka nevojë për para, por ka shumë hajdutë. Ky është problemi i këtij vendi. Pra, ajo që duhet të bëjmë është burgosja e hajdutëve”.

Villavicencio ishte një nga tetë kandidatët që po garojnë në zgjedhjet presidenciale të 20 gushtit, por nuk ishte në krye të sondazheve. Rivalët e kandidatit të Lëvizjes Ndërtoni Ekuadorin, reaguan ndaj vdekjes së tij të dhunshme.

“Të dashur ekuadorianë, jam i indinjuar nga kjo vrasje e Fernando Villavicencios. Më e pakta që mund të bëj është të shprehë solidaritetin tim me të afërmit dhe përkrahësit e tij. Për këtë arsye pezullova fushatën elektorale dhe ftoj kandidatët e tjerë të lënë mënjanë dallimet politike dhe të arrijnë një marrëveshje për sigurinë. Nesër në Kito i ftoj të marrin masa konkrete. Kjo nuk mund të vazhdojë. Duhet të ndalim dhunën”, tha Yaku Perez, kandidat për president.

“Më vjen shumë keq për vrasjen e Fernando Villavicencios nga kriminelët. Dua t’i shpreh ngushëllimet e mia të përzemërta familjes dhe miqve të tij. Sot më shumë se kurrë kemi nevojë t’i japim një goditje të fortë krimit”, tha Jan Tema, një kandidat tjetër për president në Ekuador.

Zyra e Prokurorit të Përgjithshëm të Ekuadorit tha se një i dyshuar për vrasjen e politikanit Villavicencio vdiq nga plagët pasi u arrestua nga autoritetet.

Policia konfirmoi se disa njerëz të tjerë u plagosën gjatë incidentit, përfshirë oficerë policie, dhe e ka cilësuar ngjarjen një akt terrorist, duke premtuar se do të kryejë një hetim të plotë të vrasjes.

Fernando Villavicencio ishte i martuar dhe ka lënë pas pesë fëmijë.