Elona Guri: Mos i jep gojës siç i jep b….. o Gaz! Reagon Bardhi: Nuk e njoh zonjën!

Edhe sot Sekretari i Përgjithshëm i PD, Gazment Bardhi, përsëriti se LSI refuzoi listën e përbashkët me PD për të maksimizuar votat në zgjedhje ndërkohë për akuzat e mbrëmshme të anëtares së Kryesisë së LSI, Elona Guri se kishte bërë marrëveshje me PS që t’i mbante 8 mandate në Elbasan dhe se nuk pranoi të bëjë konferencë shtypi kundër Suel Çelës, Bardhi tha se arsyeja e vetme pse nuk morën asnjë mandat në Elbasan ishte se nuk erdhën asnjë ditë në fushatë.

“Nuk e njoh fare kush është zonja. Unë kam dhënë me dhjetëra konferenca për shtyp. Ju jeni dëshmitarë, konferencat e mia janë publike, ato që u fshehën dhe nuk erdhën një ditë në qarkun e Elbasanit edhe pse drejtuan qarkun e Elbasanit, janë arsyeja e vetme se Lëvizja Socialiste për Integrim nuk arriti dot të merrte asnjë mandat për fat të keq në qarkun e Elbasanit,” tha Gazment Bardhi duke shtuar se besoj që e dini se Lëvizja Socialiste për Integrim nuk ka zhvilluar fushatë në qarkun e Elbasanit.

Ndryshe Sekretari i Përgjithshëm i PD-së, Gazmend Bardhi deklaroi në emisionin Open se PD i ofroi LSI-së 15 mandate nëse do hynin në zgjedhjet e 25 prillit në një listë të vetme. Sipas tij, LSI i ishte përgjigjur se mund të fitonte e vetme 34 mandate.

Pas kësaj deklarate ka reaguar ashpër Kryetarja e LSI, Monika Kryemadhi, duke theksuar se “listës së mashtrimit, që për djegien e mandateve do t’i dilte në krah kancelarja Merkel dhe PPE, iu shtua tashmë publikisht edhe kjo e 15 mandateve të ofruara. Një mashtrim pervers që kalon çdo limit njerzor dhe që i shërben vetëm Ramës dhe hijes së tij” dhe po me të njejtën gjuhë anëtarja e Kryesisë së LSI, Elona Guri duke e akuzuar se kishte bërë marrëveshje me PS që ti mbante 8 mandate.

“Mos i jep gojës siç i jep b….. o Gaz! Ki kujdes kur flet për gjëra që nuk i di se ty nuk të qaste njeri në zyrë. Monika Kryemadhi të ka ballafaquar me Lulzim Bashën edhe këshilltarin izraelit dhe Petrit Vasilin në zyrën e Bashës se si ti kishe bërë marrëveshjen 8 mandate t’i mbante PS në Elbasan dhe ti doje mandatet e LSI dhe ti kishe dalë garant bandave se do ishe ministër I brendshëm. Ju edhe i regjistroni bisedat e ke aty regjistrimin dhe se si ti nuk pranove të bëje konferencë shtypi kundër Suel Çelës. Ti beson se këshilltari izraelit nuk kuptonte shqip se çfare u tha aty?”