Elversberg, klubi i Bundesligës nga një fshat

Klubi më i vogël i Bundesligës bëri histori dhe u bë skuadra e 59-të që luajti në klasën elitare të futbollit gjerman. Vjen nga një vend që nuk ka as stacion treni.

Ku ndodhet Elversbergu?

Elversbergu është një qytet i vogël në verilindje të Saarbrückenit. Është pjesë e komunës Spiesen-Elversberg, e cila ka rreth 13.000 banorë, ndërsa vetë Elversbergu ka vetëm rreth 7.000 banorë. Nuk ka stacion treni në qytet dhe ka vetëm tre furra buke.

Sa kohë ekziston klubi?

Klubi futbollistik u themelua në vitin 1907, u mbyll përkohësisht gjatë Luftës së Parë Botërore dhe u rithemelua në vitin 1918.

Në vitin 2013, klubi arriti në kategorinë e tretë së bashku me RB Leipzig, por ra menjëherë nga liga. Pas dy ndeshjeve të humbura në playoff në vitin 2016 dhe 2017, një rikthim në kategorinë e tretë pasoi në vitin 2022, pas së cilës ky klub fitoi një reputacion gjithnjë e në rritje në Gjermanidhe regjistroi një ngritje të papritur.

Kjo ngritje përkoi me ardhjen e Nils-Ole Book në vitin 2017, dhe një vit më vonë, të trajnerit Horst Steffen, një ish-lojtar i Bundesligës. Book fillimisht punoi si skaut dhe më pas si drejtor sportiv, ku luajti një rol kyç në rekrutimin e lojtarëve.

Steffen e udhëhoqi ekipin në dy ngjitje radhazi, dhe klubi arriti në ligën e dytë në vitin 2023. Në këtë udhëtim, sulmuesi i njohur gjerman Nick Woltemade aktualisht lojtar i Newcastle, luajti një rol të rëndësishëm, ndërsa lojtari i Bayernit Paul Wanner përfundoi një huazim shumë të suksesshëm një vit më vonë.

Si arritën ata në Bundesligë?

Në sezonin e tyre të dytë në ligën e dytë, Elversberg luajti në kualifikimet për hyrje në Bundesligë, por humbën pas një goli dramatik nga Heidenheim në minutën e 95-të. Pas kësaj, klubi mbeti pa trajnerin Steffen (i cili shkoi tek Werder Bremen), ndërsa disa lojtarë kyç u larguan (p.sh. Fisnik Asllani, i cili u kthye në Hoffenheim). Dhe kur dukej se klubi do të pasonte një goditje të rëndë dhe do të luftonte për mbijetesë në ligën e dytë, ndodhi ajo që shumë pak njerëz e kanë pritur.

Ngritja në Bundesligën e parë

Vazhdimësia në menaxhim rezultoi të ishte vendimtare. Klubi drejtohet nga Frank Holzer, kryetari i bordit mbikëqyrës, dhe djali i tij Dominik, President i klubit, të cilët janë edhe dyshja kryesore në kompaninë që është sponsori kryesor i klubit – Ursapharm.

Ardhja e trajnerit Vincent Wagner nga ekipi i dytë i Hoffenheim rezultoi një sukses i plotë – ai e mbajti sistemin ekzistues të lojës dhe e përmirësoi atë. Ndihmëstrajneri Mike Frantz, një ish-lojtar i Bundesligës, dhe menaxherja e ekipit Selina Wagner, fituese e Ligës së Kampionëve me Wolfsburg, luajtën një rol të rëndësishëm në stafin profesional.

Pavarësisht largimit të disa personave kyç – sulmuesit Younes Ebnoutalib, Eintracht Frankfurt, dhe drejtorit sportiv Book, Borussia Dortmund, ekipi e ruajti stabilitetin. Pas një humbjeje në lojën e parafundit në kampionat, situata u ndërlikua. Por një fitore në ndeshjen e fundit ishte e mjaftueshme për të zënë vendin e dytë dhe falë një diference më të mirë golash – ekipi shënoi rezultat historik duke hyrë në Bundesligë.

“Një mik i imi më tha: ‘Nëse Elversberg arrin në Bundesligë, është si të fluturosh në hënë.’ Sot kemi arritur në hënë”, tha Wagner pas ndeshjes së fundit.

Ku luhen ndeshjet?

Elversberg luan ndeshjet e tij në Waldstadion an der Kaiserlinde, ku mund të futen 10,000 shikues – më shumë sesa që vetë qyteti ka banorë. Puna për të zgjeruar kapacitetin në 15,000, siç kërkohet nga Bundesliga, duhet të përfundojë deri në vitin 2027.

Cilët janë lojtarët kryesorë?

Mesfushori Bambase Conte, i huazuar nga Hoffenheim, ka qenë një nga lojtarët kryesorë në garën për ngjitje në nivelin elitar. Portieri Nicolas Kristof pati një sezon të shkëlqyer, ashtu si edhe anësori Lukas Petkov me 13 gola dhe shtatë asistime. Sulmuesi David Mokwa, i sjellë në janar për 1.5 milion euro, e forcoi edhe më shumë ekipin.

Mosha mesatare e ekipit është 25.3 vjeç, gjë që e bënte atë një nga më të rejat në Bundesligën e dytë. Klubi thuhet se fitoi rreth 10 milion euro nga transferimet dhe shpenzoi vetëm tre milion për përforcime, gjë që tregon qartë strategjinë e biznesit racional. Mbetet për t’u parë tani se si klubi do ta “montojë” një ekip të aftë për mbijetesë në Bundesligën e parë./DW/