Emërimi i Palmer, tendencë për marrëveshje të nxituar mes Kosovës dhe Serbisë
Emërimi i Mathew Palmer si Përfaqësues Special i Sekretarit amerikan të Shtetit për Ballkanin Perëndimor, është një tendencë për të arritur një marrëveshje të nxituar midis Kosovës dhe Serbisë, vlerëson Eksperti amerikan i zhvillimeve politike në Ballkan, Daniel Serwer, duke folur për VOA ndërsa parashikon se kjo mund të ndodhë deri në Nëntorin e vitit 2020.
“Pas emërimit, unë do të shpresoja për një politikë më të qartë të SHBA-së për shkëmbimin e territoreve dhe për një koordinim më të mirë me Evropën. Por kam frikë se kjo është një tendencë për të nxituar drejt arritjes së një marrëveshje përpara nëntorit të vitit 2020 kur edhe mbahen zgjedhjet presidenciale.”
Eksperti për Ballkanin dhe ligjëruesi në Universiteti Johns Hopkins, Edward Joseph mendon se emërimi j një Përfaqësuesi Special nuk është një vendim i lehtë për t’u marrë.
“Qëllimi është që ai të flas si përfaqësues dhe të ketë respekt më të madh pasi që do të flas direkt në emër të Sekretarit të Shtetit. Është e qartë që tregon qëllimin e SHBA-së për të pasur ndikim sa më të madh në rajon, dhe me siguri për të pasur një zgjidhje të problemit të Kosovës.”
Por cili është qëllimi i Administratës Amerikane:
“A është për të shpejtuar përpjekjet për të arritur një zgjidhje të rrezikshme për ndarjen e Kosovës? Nëse po si do të adresohen aspektet negative të kësaj ideje. Po në lidhje me paralajmërimet publike, jo vetëm nga ekspertë si unë por edhe nga zyrtarë të vendeve fqinje në rajon se ata do të duhet të jetojnë me pasojat e një zgjidhje të tillë. Si do të tejkalohet kundërshtimi nga disa vende, veçanërisht nga Gjermania?”
Edward Joseph mendon se këto janë vetëm disa nga çështjet e hapura në rajon i cili vazhdon të jetë shumë pak i integruar dhe po përballet me ndërhyrjet e paprecedentë të Rusisë dhe investimet e Kinës.
Ndryshe, pas emërimit të Mathew Palmer si Përfaqësues Special i Sekretarit amerikan të Shtetit për Ballkanin Perëndimor, ai do të përfaqësoj SHBA-në në Forumin Strategjik që zhvillohet nesër në Bled të Sllovenisë si dhe në takimet që do të zhvillohen në Bruksel, Vjenë e Podgoricë nga 4-10 Shtator.
