Eurostat: 51% e shqiptarëve janë në rrezik varfërie, më e larta në Europë
Në vitin 2019, 50.8 për qind e shqiptarëve ishin në rrezik varfërie, ose përjashtimi social, një përqindje që është më e larta në Europë. Të dhënat janë publikuar nga instituti europian i statistikave, Eurostat.
Shteti i dytë në renditje pas Shqipërisë është Mali i Zi, me 36.6 për qind ose 14.4 pikë përqindje më pak se Shqipëria).
Maqedonia e Veriut renditjet e katërta me 34.2 për qind, dhe Serbia me 31.1 për qind. (të dhënat për Bosnjë Hercegovinën dhe Kosovën mungojnë).
Eurostat raporton se faktorët që ndikojnë varfërinë ose përjashtimin social ndikohen nga tregues të tillë si intensiteti në punë, niveli i edukimit, lloji i familjarit (sa fëmijë ka në varësi), kushtet e jetesës dhe migracionit.
Përqindja e shqiptarëve që ishin në rrezik varfërie, ose përjashtimi social në 2019-n ishte mëse dy herë më e lartë sesa mesatarja e Bashkimit Europian, BE, prej 21.1 për qind. Këtë tregues, më të ulëtin në Europë e kanë Sllovenia dhe Çekia, me përkatësisht 13.7 dhe 12.1 për qind.
Sipas grupmoshave, në rrezik varfërie dhe përjashtimi social janë 53.9 për qind e fëmijëve nën 18 vjeç, sërish më e larta në Europë. I dyti pas nesh është Mali i Zi me 43.9 për qind, ndërsa mesatarja e BE-së është 22.8 për qind.
Përqindja e varfërisë dhe përjashtimit social ulet lehtë për grupmoshën 18-64 vjeç, në 49 për qind (nga 21.1 për qind që është mesatarja e BE-së dhe 35 për qind e dyta pas Shqipërisë që është sërish Mali i Zi.
Për grupmoshat mbi 65 vjeç treguesi rritet sërish për Shqipërinë, në 54 për qind, nga 19.4 për qind që është mesatarja europiane dhe 47 për qind i dyti pas nesh, që është Bullgaria.
Të dhënat për Europën në 2020-n
Për shtetet e Bashkimit Europian, të dhënat janë publikuar edhe për vitin 2020. Për mesataren e BE, në vitin pandemik, përqindja e popullsisë në rrezik varfërie dhe përjashtimi social është rritur në 21.9%, nga 21.1% që ishte në 2019-n.
Faktorët që ndikojnë në rrezikun e varfërisë ose përjashtimit social në BE në vitin 2020 përfshinin:
– intensiteti i punës: 71.9% e popullsisë së moshës më pak se 60 vjeç që jeton në familje me intensitet shumë të ulët të punës, me fëmijë në ngarkim, ishin në rrezik të varfërisë;
– niveli i arsimimit: 50,5% e fëmijëve, niveli i arsimimit të prindërve të të cilëve ishte i ulët, ishin në rrezik të varfërisë, krahasuar me 7,7% të fëmijëve, niveli i arsimimit të prindërve të të cilëve ishte i lartë;
– lloji i familjes: familjet e përbëra nga një person i vetëm me fëmijë në ngarkim (42.1%), familjet me një person (33.2%) dhe familjet e përbëra nga dy të rritur me tre ose më shumë fëmijë në ngarkim (29.6 %) kishin rrezikun më të lartë të varfërisë ose perjashtim social;
– prejardhje migrante: fëmijët me të paktën një prind me prejardhje migrante ishin në rrezik më të madh të varfërisë sesa fëmijët prindërit e të cilëve ishin të dy të lindur në vend (32.9% krahasuar me 15.3%);
– Kushtet e jetesës: 14.1% e familjeve të përbëra nga një person i vetëm me fëmijë në ngarkim ishin të privuar rëndë materialisht dhe socialisht krahasuar me 7.5% të të gjitha familjeve me fëmijë në ngarkim./Monitor/
