Evropianët presin që liderët e Kosovës dhe Serbisë të takohen në Granadë të Spanjës

Sot 47 liderë evropianë në kuadër të një mbledhjeje të zgjeruar të Komunitetit Politik Evropian, takohen në Granadë të Spanjës, ku në fokus kanë përmirësimin e bashkëpunimit, pavarësisht përkeqësimit të konflikteve dhe tensioneve në kontinent.

Takimi i tretë i tillë organizohet për t’iu dhënë shteteve mundësi për ta zgjeruar dialogun përtej kufijve të bllokut evropian me 27 anëtarë.

Ky organizim synon të rrisë mundësitë për liderët që të takohen në grupe më të vogla për takime joformale, pa simbolikën dhe protokollet e vizitave shtetërore.

Tensionet e fundit mes Kosovës dhe Serbisë, dhe në mes të Armenisë dhe Azerbajxhanit – të gjitha pjesë e Komunitetit Politik Evropian – pritet të jenë sot në qendër të diskutimeve.

Më 24 shtator, Policia e Kosovës është sulmuar nga një grup i armatosur në Banjskë të Zveçanit, dhe për pasojë është vrarë një polic.

Në shkëmbim e sipër të zjarrit janë vrarë edhe tre sulmues.

Kosova e ka fajësuar Serbinë për sulmin, mirëpo kjo e fundit e ka mohuar pretendimin.

Po në shtator, Azerbajxhani e ka nisur një ofensivë ushtarake për ta marrë kontrollin e rajonit të kontestuar në Nagorno-Karabakut, duke nxitur ikjen e rreth 100.000 armenëve të Karabakut.

Liderët evropianë shpresojnë që liderët e Kosovës dhe Serbisë, dhe Armenisë e Azerbajxhanit do të pajtohen për të biseduar në margjina të samitit.

Mirëpo, deri më tani presidenti i Azerbajxhanit, Ilham Aliyev raportohet se do ta abstenojë takimin.

Kancelari gjerman, Olaf Scholz dhe homologët e tij, pritet të diskutojnë edhe për inteligjencën artificiale, sigurinë energjetike dhe tranzicionin në energji të ripërtrishme.

Nesër, më 6 tetor, liderët e BE-së do të bisedojnë ndaras me fokus në zgjerim dhe migrim./RFE/